بۇگىن تاڭەرتەڭ استانا – ششۋچينسك تاس جولىندا Toyota Land Cruiser Prado كولىگىنىڭ قاتىسۋىمەن جول-كولىك وقيعاسى بولدى. اۆتوكولىك اقى تولەۋ پۋنكتىنىڭ ءدال قاسىندا اۋدارىلىپ قالدى، دەپ حابارلايدى infohub.kz سايتى.
«كازاۆتوجول» ۇلتتىق كومپانياسىنىڭ ءباسپاسوز قىزمەتىنىڭ مالىمەتىنشە، وقيعا 15 تامىزدا ساعات 08:43-تە «استانا» تولەم پۋنكتىنە جاقىنداعان كەزدە بولعان. الدىن الا انىقتالعانداي، جۇرگىزۋشى رۋلدە ۇيىقتاپ كەتكەن، سالدارىنان كولىك باسقارۋدان شىعىپ، قوزعالىستىڭ ءۇشىنشى جانە ءتورتىنشى جولاقتارى اراسىنداعى جول ينفراقۇرىلىمىنىڭ ەلەمەنتتەرىنە سوعىلعان.
باقىتىمىزعا وراي، اپات سالدارىنان ەشكىم زارداپ شەككەن جوق. جۇرگىزۋشى كولىكتە جالعىز بولعان جانە مەديسينالىق كومەكتەن باس تارتقان. جكو سالدارىنان ءۇشىنشى جانە ءتورتىنشى جولاقتار بويىنشا قوزعالىس ۋاقىتشا شەكتەلگەن. وقيعانىڭ سالدارى جويىلعاننان كەيىن ساعات 11:34-تە قوزعالىس تولىق قالپىنا كەلتىرىلدى.
كومپانيادا سوققى سالدارىنان جول بەلگىسى، ءبولۋ بۋفەرى جانە بەتون بلوك زاقىمدانعانىن ناقتىلادى. جۇرگىزۋشىلەرگە شارشاعاندىق زەيىن مەن رەاكسيا جىلدامدىعىن باسقا ءقاۋىپتى فاكتورلاردان كەم تۇسىرمەيتىنىن ەسكە سالدى. «جولدا ۇيقىشىلدىق سەزسەڭىز، كوزىڭىزدىڭ اۋىرلىعىن بايقاساڭىز نەمەسە زەيىنىڭىزدىڭ تومەندەپ بارا جاتقانىن اڭعارساڭىز، مەجەلى جەرگە "جەتەمىن" دەپ ارەكەت جاساماڭىز. ءقاۋىپسىز جەرگە توقتاپ، دەمالىڭىز. بۇگىن ءبارى زاقىمدالعان كولىك پەن جول ينفراقۇرىلىمىمەن اياقتالدى. باسقا جاعدايدا بىرنەشە سەكۋندتىق ۇيقىنىڭ باعاسى الدەقايدا جوعارى بولۋى مۇمكىن»، — دەلىنگەن حابارلامادا.