استانادا سوت ويىن-ساۋىق مەكەمەسىندە TikTok-تە تىكەلەي ەفير جۇرگىزىپ، «كۇڭكىل گاز» جۇتقان جانە بىلاپىت سويلەگەن ايەلگە اكىمشىلىك جازا شاراسىن وزگەرتتى — اكىمشىلىك قاماۋعا الۋدىڭ ورنىنا وعان ايىپپۇل سالىندى، دەپ حابارلايدى infohub.kz سايتى.
استانانىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ مالىمەتىنشە، ازاماتشاعا قاتىستى ۇساق بۇزاقىلىقتى قايتالاپ جاساۋ تۋرالى ءىس — اكىمشىلىك قۇقىق بۇزۋشىلىق تۋرالى كودەكستىڭ 434-بابىنىڭ 2-بولىگى بويىنشا قارالعان.
«13 قىركۇيەكتە شامامەن ساعات 07:00-دە ءا. قوعامدىق ورىن بولىپ تابىلاتىن ويىن-ساۋىق مەكەمەسىندە ءوزىن دورەكى جانە وركوكىرەك ۇستاپ، اۋە شارىنىڭ ىشىندەگىسىن ادەيى دەمەپ شىعارىپ، بىلاپىت سوزدەر ايتتى. وسىلايشا ول اينالاسىنداعىلارعا اشىق قۇرمەتسىزدىك تانىتىپ، قوعامدىق ءتارتىپتى جانە ازاماتتاردىڭ تىنىشتىعىن بۇزدى»، — دەپ اتاپ ءوتتى سوتتا.
بۇعان دەيىن ايەل اقبتك-نىڭ 434-بابىنىڭ 1-بولىگى بويىنشا اكىمشىلىك جاۋاپكەرشىلىككە تارتىلعانى بەلگىلى بولدى. اتالعان قۇقىق بۇزۋشىلىق ول تاراپىنان اكىمشىلىك جازا قولدانىلعاننان كەيىن ءبىر جىل ىشىندە جاسالعان.
«سوت وتىرىسىندا ءا. كىناسىن مويىنداپ، الكوگولدىك سۋسىن ىشكەنىن، مەكەمەدەن گاز تولتىرىلعان اۋە شارىن ساتىپ العانىن جانە ارەكەتىنىڭ سالدارىن ويلاماستان TikTok الەۋمەتتىك جەلىسىندە تىكەلەي ەفيرگە شىققانىن ءتۇسىندىردى»، — دەدى سوتتا.
اكىمشىلىك جازا تاعايىنداۋ كەزىندە سوت ازاماتشانىڭ 14 جاسقا تولماعان بالانى جالعىز ءوزى تاربيەلەپ وتىرعانىن انىقتادى. قولدانىستاعى زاڭناماعا سايكەس 14 جاسقا دەيىنگى بالاسى بار ايەلدەرگە اكىمشىلىك قاماۋعا الۋ قولدانىلمايدى.
«اقبتك-نىڭ 434-بابىنىڭ 2-بولىگىندە كوزدەلگەن اكىمشىلىك قاماۋعا الۋ تۇرىندەگى جازا ءا-عا قولدانىلا المايتىندىقتان، سوت قۇقىق بۇزۋشىلىقتىڭ سارالانۋىن نەعۇرلىم جەڭىل اكىمشىلىك جازا كوزدەيتىن نورماعا (اقبتك-نىڭ 829-14-بابىنىڭ 4-بولىگى) وزگەرتتى. وسىنى ەسكەرە وتىرىپ، ءا-نىڭ ارەكەتتەرى 20 اەك مولشەرىندە ايىپپۇل سالۋدى كوزدەيتىن اقبتك-نىڭ 434-بابىنىڭ 3-بولىگى بويىنشا سارالاندى. سوت قاۋلىسىمەن ءا. كىنالى دەپ تانىلىپ، 86 500 تەڭگە مولشەرىندە ايىپپۇل تۇرىندەگى اكىمشىلىك جازاعا تارتىلدى»، — دەپ اتاپ ءوتتى سوتتا.
قاۋلى زاڭدى كۇشىنە ەنگەن جوق.
بۇعان دەيىن الەۋمەتتىك جەلىلەردى مونيتورينگىلەۋ بارىسىندا پوليسيا قىزمەتكەرلەرى قىزدىڭ قاتىسۋىمەن جاريالانعان جازبانى انىقتاعانى حابارلانعان. تىكەلەي ەفير كەزىندە ول ءوزىن اگرەسسيۆتى ۇستاپ، قوعامدىق ءتارتىپتى بۇزىپ، بىلاپىت سويلەگەن. كوپ ۇزاماي وسى دەرەك بويىنشا پوليسەيلەر الماتى وبلىسىنىڭ 27 جاستاعى تۋماسىن انىقتاعان.