استانانىڭ مامانداندىرىلعان اۋدانارالىق ەكونوميكالىق سوتى سالتانات نۇكەنوۆانى ولتىرگەنى ءۇشىن سوتتالعان قۋاندىق بيشىمباەۆتىڭ اناسى الميرا نۇرلىبەكوۆانىڭ ونىڭ بۇرىنعى جۇبايى نازىم قاحارمانعا قويعان تالاپ-ارىزى بويىنشا شەشىم شىعاردى. ارىزدا 14 ملن تەڭگەدەن استام قاراجات ءوندىرىپ الۋ سۇرالعان، دەپ حابارلايدى infohub.kz سايتى.
ءىس ماتەريالدارىنا سايكەس، جەكە كاسىپكەر نۇرلىبەكوۆا 2023 جىلعى 1 قاراشادا وزىنە تيەسىلى ءۇي-جايدى جاۋاپكەرگە — نازىم قاحارمان يەلىك ەتەتىن «NazKa» جك-عا 2029 جىلعى 31 قازانعا دەيىنگى مەرزىمگە سەنىمگەرلىك باسقارۋعا بەرگەن.
«تالاپ قويۋشى جاۋاپكەردىڭ ءوزىنىڭ مۇلكىن جالعا بەرۋدەن تابىس العانىن، الايدا ءۇي-جايدى پايدالانعاننان تۇسكەن قاراجاتتى تالاپ قويۋشىعا بەرمەگەنىن جانە راستايتىن قۇجاتتارى بار تولىق ەسەپ ۇسىنباعانىن، مۇنىڭ سەنىمگەرلىك باسقارۋشى مىندەتتەمەلەرىن تيىسىنشە ورىنداماۋ بولىپ تابىلاتىنىن كورسەتتى»، — دەلىنگەن ءىس ماتەريالدارىندا.
ناتيجەسىندە نۇرلىبەكوۆا سوت ارقىلى «NazKa» جك-دان شارتتىق مىندەتتەمەلەردى تيىسىنشە ورىنداماعانى ءۇشىن 14 074 771 تەڭگە ءوندىرىپ الۋدى، سونداي-اق تولەنگەن مەملەكەتتىك باج مەن وكىل قىزمەتىنە جۇمسالعان شىعىندى وتەۋدى تالاپ ەتتى. جاۋاپكەر بولسا، تالاپ قويۋ سوماسى مەن ونى ءوندىرۋ نەگىزدەرىن نەگىزسىز دەپ تاۋىپ، ارىزدى تولىق كولەمدە قابىلداماۋدى سۇرادى.
داۋدى شەشۋ بارىسىندا سوت جاۋاپكەردىڭ تالاپ قويۋشى الدىنداعى بەرەشەگىنىڭ جەتكىلىكتى ءارى سەنىمدى دالەلدەرىن انىقتاي الماي، تالاپ قويۋشىنىڭ دالەلدەرىمەن ءىشىنارا عانا كەلىستى. وسى سەبەپتى سومانىڭ ءبىر بولىگى — 5 839 380 تەڭگە — قاناعاتتاندىرۋعا جاتپايدى، دەلىنگەن شەشىمدە.
«„نۇرلىبەكوۆا الميرا بالتاباەۆنا“ جك-نىڭ „NazKa“ جك-عا سومانى ءوندىرۋ تۋرالى تالاپ قويۋىن ءىشىنارا قاناعاتتاندىرۋ. „NazKa“ جك-دان „نۇرلىبەكوۆا الميرا بالتاباەۆنا“ جك-نىڭ پايداسىنا 6 665 391 تەڭگە، 66 654 تەڭگە مەملەكەتتىك باج، 666 539 تەڭگە وكىل قىزمەتىنە جۇمسالعان شىعىن ءوندىرىلسىن. „نۇرلىبەكوۆا الميرا بالتاباەۆنا“ جك-نىڭ „NazKa“ جك-عا 7 409 380 تەڭگە سومانى ءوندىرۋ تۋرالى تالاپ قويۋىن قاناعاتتاندىرۋدان باس تارتىلسىن»، — دەلىنگەن سوت شەشىمىندە.
شەشىمگە اپەللياسيالىق شاعىم تۇسىرۋگە بولادى.
بۇعان دەيىن سالتانات نۇكەنوۆانى ولتىرگەنى ءۇشىن سوتتالعان قۋاندىق بيشىمباەۆتىڭ بۇرىنعى ايەلى نازىم قاحارمان وعان ونىڭ اناسى سوتقا تالاپ قويعانىن مالىمدەگەن. ول كەزدە تالاپ سوماسى شامامەن 25 ملن تەڭگە ەكەنىن ايتقان.