استانانىڭ اكىمشىلىك سوتىندا بلوگەر ەربولات جانابىلوۆتىڭ تۇرمىستىق جانجال فاكتىسى بويىنشا قوزعالعان ءىسى بويىنشا وتىرىس باستالدى. ءىس قاراۋدىڭ باسىندا-اق سوتتالۋشى قوعام مەن ءباسپاسوزدىڭ قاتىسۋىن شەكتەۋدى سۇرادى، دەپ حابارلايدى infohub.kz سايتى.
«قۇرمەتتى سوت، مەنى تۇسىرمەۋلەرىن جانە جۋرناليستەردىڭ قاتىسپاۋىن، ءىستى جابىق وتكىزۋدى سۇرايمىن. بۇل — جەكە ءومىر، ولارعا بۇنى ءبىلۋدىڭ قاجەتى جوق دەپ ويلايمىن»، — دەدى بلوگەر.
ونىڭ جۇبايى ەلميرا تولەگەنوۆا دا سوتقا جۇگىنىپ، ولاردىڭ جەكە قارىم-قاتىناسىن جابىق ەسىكتەردىڭ ارتىندا قالدىرعىسى كەلەتىنىن ايتتى.
وسى مالىمدەمەلەردەن كەيىن زالدا وتىرعان جۋرناليستەردەن سوت زالىنان شىعۋدى سۇرادى.
ايتا كەتەيىك، ەربولات جانابىلوۆقا قاتىستى ءىس قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 73-بابىنىڭ 1-بولىگى — «وتباسىلىق-تۇرمىستىق قاتىناستار سالاسىنداعى قۇقىققا قارسى ارەكەتتەر» بويىنشا قوزعالدى.
73-باپتىڭ ءبىرىنشى بولىگى وتباسىلىق-تۇرمىستىق قاتىناستاعى ادامدارعا قۇرمەتسىزدىك بىلدىرەتىن، ولاردىڭ تىنىشتىعىن بۇزاتىن، تۇرعىن ۇيدە جاسالعان، ەگەر بۇل ارەكەتتەردە قىلمىستىق جازالاناتىن ارەكەت بەلگىلەرى بولماسا، بىلاپىت سويلەۋ، قورلايتىن مازالاۋ، كەمسىتۋ، ءۇي مۇلكىن ءبۇلدىرۋ جانە باسقا دا ارەكەتتەردى قامتيدى. بۇل ەسكەرتۋ نەمەسە 20 ساعاتقا قوعامدىق جۇمىستارعا تارتۋ نە 5 تاۋلىككە اكىمشىلىك قاماۋعا الۋعا اكەپ سوعادى.
بۇعان دەيىن بلوگەر ەلميرا تولەگەنوۆا الەۋمەتتىك جەلىلەردەگى ۇندەۋىندە ەربولات جانابىلوۆپەن اجىراسىپ جاتقانىن ايتقان. سونداي-اق ول جۇبايىمەن بولعان جۋىرداعى جانجالعا قاتىستى پىكىر ءبىلدىردى — الەۋمەتتىك جەلىلەردە ونىڭ گاردەروبقا تىعىلىپ، ىشىنەن جابىلعان ۆيدەوسى تارادى.
كەيىن ەربولات جانابىلوۆتىڭ جۇبايى ەلميرا تولەگەنوۆامەن تۇرمىستىق جانجالدان كەيىن جاۋاپكەرشىلىككە تارتىلعانى بەلگىلى بولدى.
سونداي-اق ەسكە سالايىق، 27 ساۋىردە بلوگەرلەرگە قاتىستى ۇكىم شىعارىلدى. سۋديا پروكۋرور ۇسىنعان مەرزىمدەرمەن كەلىستى — بلوگەرلەر زاڭسىز كاسىپكەرلىك جانە قىلمىستىق جولمەن الىنعان اقشانى جانە (نەمەسە) وزگە م ۇلىكتى زاڭداستىرۋ (جىلىستاتۋ) بويىنشا كىنالى دەپ تانىلدى.
سوت سونداي-اق جانابىلوۆ پەن تولەگەنوۆا قىلمىستىق قاراجاتقا ساتىپ العان iPhone 16 (17 دانا) جانە Hyundai Elantra (8 دانا) كولىگىن تاركىلەۋگە شەشىم قابىلدادى.