استانا تۇرعىنى ءتىس ەمدەۋ كلينيكاسىندا ۋادە ەتىلگەن، ءبىراق كورسەتىلمەگەن قىزمەتتەر ءۇشىن اقشاسىن ءىشىنارا قايتارىپ الا الدى، دەپ حابارلايدى infohub.kz سايتى.
تۇتىنۋشىلاردىڭ قۇقىقتارىن قورعاۋ كوميتەتىنىڭ مالىمەتىنشە، استانا قالاسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە جالپى قۇنى 802 725 تەڭگە بولاتىن ءتىس ەمدەۋگە راسسروچكا رەسىمدەگەن ازامات جۇگىنگەن.
تۇتىنۋشىعا ءتىس ەمدەۋ مەن جۇلۋدى، سونداي-اق برەكەت-جۇيەسىن ورناتۋدى قامتيتىن كەشەندى ستوماتولوگيالىق قىزمەتتەر بەلگىلەنگەن مەرزىمدە كورسەتىلۋى ءتيىس ەدى. الايدا ءىس جۇزىندە تولەنگەن قىزمەتتەردىڭ تەك ءبىر بولىگى عانا كورسەتىلگەن. تۇتىنۋشىعا ورتودونت ۇسىنىلماعان، ورتودونتيالىق ەمدەۋ جوسپارى جاسالماعان، ال برەكەت-جۇيەسىن ورناتۋ مەرزىمدەرى بىرنەشە رەت كەيىنگە شەگەرىلگەن.
وسىعان بايلانىستى تۇتىنۋشى ستوماتولوگيالىق كلينيكاعا كورسەتىلمەگەن قىزمەتتەر ءۇشىن اقشانى قايتارۋدى تالاپ ەتىپ جۇگىنگەن، الايدا ءتيىستى جاۋاپ الماعان.
ءوتىنىشتى قاراۋ بارىسىندا ماماندار جاعدايدى رەتتەۋ بويىنشا جۇمىس جۇرگىزگەن. ناتيجەسىندە تۇتىنۋشىعا كورسەتىلمەگەن قىزمەتتەر ءۇشىن اقشا قايتارىلعان.
ءباسپاسوز قىزمەتىندە اتاپ وتىلگەندەي: «مەديسينالىق جانە وزگە دە قىزمەتتەردى تولەۋ كەزىندە تۇتىنۋشىلارعا شارتتاردى، چەكتەردى، تولەمدى راستايتىن قۇجاتتاردى، سونداي-اق ورىنداۋشىمەن حات الماسۋدى ساقتاۋ ۇسىنىلادى. داۋلى جاعداي تۋىنداعان كەزدە ورىنداۋشىعا جازباشا شاعىمدى ۋاقىتىلى جىبەرۋ قاجەت. قۇقىقتار بۇزىلعان جاعدايدا تۇتىنۋشى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە كەڭەس الۋ جانە بۇزىلعان قۇقىقتاردى قالپىنا كەلتىرۋگە جاردەمدەسۋ ءۇشىن جۇگىنۋگە قۇقىلى».