2026 جىلعى 15 قىركۇيەكتە تاڭەرتەڭ استاناداعى سىعاناق كوشەسىندەگى قوزعالىس ءىس جۇزىندە توقتاپ قالدى: قاتتى كەپتەلىستەن كەيبىر اۆتوبۋس جولاۋشىلارى كولىكتەن ءتۇسىپ، جۇمىسقا دەيىن جاياۋ ءجۇردى، دەپ حابارلايدى infohub.kz سايتى.
جول جاعدايى تۋرالى Astanovka 98 پابليگىنىڭ قولدانۋشىلارى ايتتى. ولاردىڭ دەرەگىنشە، كەپتەلىس «جاسىل كۆارتال» اۋدانىندا پايدا بولعان.
كۋاگەرلەردىڭ ايتۋىنشا، كەپتەلىسكە سىعاناقتاعى اپات سەبەپ بولعان. سونىمەن قاتار، تۇرعىندار LRT قۇرىلىس جۇمىستارىنا بايلانىستى بۇل كوشەدە تاڭەرتەڭگى جول ءجۇرۋ ۋاقىتى ايتارلىقتاي ۇزارىپ كەتكەنىن ايتىپ شاعىمداندى.
NUR.KZ ءتىلشىسى استانا قالالىق پوليسيا دەپارتامەنتىنە پىكىر سۇراپ حابارلاستى. ۆەدومستۆو جول-كولىك وقيعاسىنىڭ بولعانىن راستادى.
«اعىمداعى جىلعى 15 قىركۇيەكتە سىعاناق جانە تولە بي كوشەلەرىنىڭ قيىلىسىندا ءۇش كولىك قاتىسقان جول-كولىك وقيعاسى بولدى. وقيعا ورنىنا دەرەۋ پوليسيا جاساعى جىبەرىلدى. كىنالى جۇرگىزۋشىگە قاتىستى اكىمشىلىك شارالار قولدانىلدى. جول-كولىك وقيعاسى سالدارىنان زارداپ شەككەندەر جوق»، — دەلىنگەن پوليسيا حابارلاماسىندا.