20-26 شىلدە ارالىعىندا استاناداعى Beeline Arena ۇلتتىق تەننيس ورتالىعىنىڭ حارد كورتتارىندا ەرەسەكتەر اراسىندا قازاقستان رەسپۋبليكاسىنىڭ تەننيستەن جازعى چەمپيوناتى ءوتتى. جارىس قورىتىندىسى بويىنشا جەكە جانە جۇپتىق سىندا ەلىمىزدىڭ ۇزدىك ويىنشىلارى انىقتالدى، دەپ حابارلايدى قازاقستان تەننيس فەدەراسياسىنىڭ (قتف) ءباسپاسوز قىزمەتى.
ايەلدەر جەكە سىنىندا ءبىرىنشى ورىندى الماتىدان كەلگەن ينكار ديۋسەباي يەلەندى، ەكىنشى ورىندى استانالىق ساندۋگاش كەنجيباەۆا، ءۇشىنشى ورىندى اقتوبە وبلىسىنان ەۆا كورىشەۆا الدى. ەرلەر جەكە سىنىندا التىندى اقتاۋدان كەلگەن دانيال راحمەتۋللايەۆ جەڭىپ الدى، كۇمىس – قىزىلوردا وبلىسىنان ەراسىل ەرديلدا، قولا – اقتوبە وبلىسىنان مانسۋر سايىنوۆ.
ايەلدەر جۇپتىق سىنىندا الماتىدان اسىلجان ارىستانبەكوۆا مەن ەركەجان ارىستانبەكوۆا جەڭىسكە جەتتى. ەكىنشى ورىن ينكار ديۋسەباي (الماتى) مەن البينا كاكەنوۆا (استانا) دۋەتىندە، ءۇشىنشى ورىن – اييا نۋپباي (الماتى) مەن اناستاسيا كرىمكوۆا (تاراز). ەرلەر جۇپتىق سىنىندا ءبىرىنشى ورىندى ەراسىل باحتيار (استانا) مەن ەراسىل ەرديلدا ( قىزىلوردا وبلىسى) يەلەندى، ەكىنشى – يلياس ماراتۋلى مەن يسلام ورىنباسار (استانا)، ءۇشىنشى – تيمۋر ساۋلەنكو مەن ارسەني ترەبۋحين (الماتى).
تۋرنير جەڭىمپازدارى ءۇشىن باستى جۇلدەك تەك ەلدەگى ۇزدىك اتاعى عانا ەمەس، سونىمەن قاتار «قازاقستان رەسپۋبليكاسىنىڭ سپورت شەبەرى» سپورتتىق اتاعىن بەرۋ قۇقىعى بولادى.