قازاقستان استاناسىندا 29 جاستاعى ەر ادام كولىككە قاتىستى الاياقتىق جاسادى دەگەن كۇدىكپەن ۇستالدى. ول بوتەن Toyota Camryء-دى ارزان باعاعا ساتىپ، يەسىنە 11،5 ملن تەڭگە كولەمىندە شىعىن كەلتىرگەن، دەپ حابارلايدى infohub.kz سايتى.
انىقتالعانداي، كۇدىكتى تانىسىنىڭ سەنىمىنە كىرىپ، ونىڭ اق ءتۇستى Toyota Camry كولىگىن سۋرەتكە ءتۇسىرىپ العان. كەيىن بۇل سۋرەتتەردى باسقا تانىسىنا كولىكتى ساتۋ ۇسىنىسى رەتىندە جىبەرىپ، كولىكتىڭ وزىنە تيەسىلى ەمەستىگىن جانە ونى ساتۋعا قۇقىعى جوقتىعىن جاسىرعان. ناتيجەسىندە كولىك يەسىنە كورسەتىلگەن مولشەردە ماتەريالدىق شىعىن كەلتىرىلگەن.
جابىرلەنۋشى پوليسياعا ارىزدانعاننان كەيىن، جەدەل-ىزدەستىرۋ ءىس-شارالارى بارىسىندا كۇدىكتى انىقتالىپ، ۇستالدى. قازىرگى ۋاقىتتا ول ۋاقىتشا ۇستاۋ يزولياتورىنا قامالدى. وسى فاكتىگە قاتىستى سوتقا دەيىنگى تەرگەۋ جۇرگىزىلۋدە.
ىشكى ىستەر مينيسترلىگى ازاماتتاردى ساق بولۋعا جانە كولىك قۇرالىن ءۇشىنشى تۇلعالارعا بەرۋ الدىندا بارلىق مامىلەلەردى زاڭناما تالاپتارىنا سايكەس رەسىمدەۋگە شاقىردى. ءتىپتى تانىستار اراسىنداعى كەلىسىمدەر دە قۇجاتتىق تۇردە بەكىتىلۋى ءتيىس. تەك سەنىمگە نەگىزدەلگەن اۋىزشا كەلىسىمدەر ازاماتتاردىڭ الاياقتاردىڭ قۇربانى بولۋىنا اكەلۋى مۇمكىن.