شەتەلدىك ترەۆەل-بلوگەر Haggagovic بۇركەنشىك ەسىمىمەن تانىمال تۇلعا الەۋمەتتىك جەلىلەردە استانادا تۇسىرىلگەن بەينەروليك جاريالادى. وندا ول پوليسيا قىزمەتكەرىن قولىنا كوتەرىپ، ونىمەن بىرگە اينالىپ جۇرگەنىن كورسەتكەن. بەينەقازاقستاندىقتاردىڭ ەكىۇداي پىكىرىن تۋدىردى: كوبىسى بلوگەردىڭ ارەكەتىن ورىنسىز دەپ ساناسا، ەندى بىرەۋلەرى ءازىل رەتىندە قابىلدادى. وقيعاعا استانا قالالىق پوليسيا دەپارتامەنتى جاۋاپ بەرىپ، قىزمەتتىك تەكسەرۋ جۇرگىزىلىپ جاتقانىن حابارلادى، دەپ جازادى infohub.kz سايتى.
«وسى فاكتى بويىنشا قىزمەتتىك تەكسەرۋ جۇرگىزىلۋدە. ونىڭ قورىتىندىسى بويىنشا قىزمەتكەرلەردىڭ ارەكەتىنە تارتىپتىك سيپاتتاعى شارالار قولدانىلادى»، — دەدى ۆەدومستۆودا.
بلوگەردىڭ سايتىنداعى مالىمەتكە سايكەس، Haggagovic ءوزىن «ساياحات كورولى»، ساياحاتشى، وقيعا ىزدەۋشى جانە تۋريزم ساراپشىسى رەتىندە تانىستىرادى، ول «XXI عاسىردىڭ يبن باتتۋتاسى» رەتىندە كەڭىنەن تانىمال. ونىڭ دەرەكتەرى بويىنشا، بۇگىنگى تاڭدا ول الەمنىڭ 189-دان استام ەلىن ارالاپ، ولاردى فوتوسۋرەتتەر مەن بەينەلەر ارقىلى قۇجاتتاعان جانە حاباردارلىقتى ارتتىرۋ مەن بەيبىتشىلىكتى تاراتۋ جولىنداعى كۇش-جىگەرىن مويىنداي وتىرىپ، كوپتەگەن ماراپاتتارعا يە بولعان. سونداي-اق ول كوپتەگەن الەم كوشباسشىلارىمەن كەزدەسىپ، وسى ەلدەردەگى وقۋشىلار مەن ۋنيۆەرسيتەت ستۋدەنتتەرىنە ءدارىس وقىپ، بەيبىتشىلىك تۋرالى حابارلاما تاراتقان.