استانا تۇرعىنى كورپۋستىق جيھازعا تاپسىرىس بەرىپ، قۇنىن تولىق تولەگەن، الايدا نە بۇيىمدى، نە اقشاسىن قايتارىپ الا الماعان. داۋ تەك استانا قالاسى بويىنشا ساۋدا جانە تۇتىنۋشىلار قۇقىعىن قورعاۋ دەپارتامەنتى ارالاسقاننان كەيىن شەشىلدى، دەپ حابارلايدى infohub.kz سايتى.
NUR.KZء-تىڭ تۇتىنۋشىلار قۇقىعىن قورعاۋ كوميتەتىنە سىلتەمە جاساپ حابارلاۋىنشا، 16 تامىزدا تۇتىنۋشى ورىنداۋشىمەن كورپۋستىق جيھاز جاساۋعا شارت جاساسقان. ەر ادام تاپسىرىستىڭ تولىق قۇنىن — 230 مىڭ تەڭگەنى بىردەن تولەگەن.
شارت تالاپتارى بويىنشا جيھاز 10 كۇن ىشىندە، ياعني 26 تامىزعا دەيىن دايىندالىپ، تاپسىرىس بەرۋشىگە جەتكىزىلۋى ءتيىس ەدى. الايدا بەلگىلەنگەن مەرزىمدە بۇيىم جەتكىزىلمەگەن، تولەنگەن اقشا دا قايتارىلماعان.
شارتتىق مىندەتتەمەلەردىڭ ورىندالماۋىنا بايلانىستى ەر ادام استانا قالاسى بويىنشا ساۋدا جانە تۇتىنۋشىلار قۇقىعىن قورعاۋ دەپارتامەنتىنە بۇزىلعان قۇقىقتارىن قالپىنا كەلتىرىپ، اقشاسىن قايتارۋعا كومەكتەسۋىن سۇراپ جۇگىنگەن.
«ءوتىنىشتى قاراۋ ناتيجەسىندە ماسەلە سوتقا دەيىنگى تارتىپپەن رەتتەلدى. تۇتىنۋشىعا اقشا تولىق كولەمدە — 230 مىڭ تەڭگە قايتارىلدى. وسىلايشا، تۇتىنۋشىنىڭ بۇزىلعان قۇقىقتارى قالپىنا كەلتىرىلىپ، داۋلى جاعداي سوتقا جۇگىنبەي-اق شەشىلدى»، — دەپ اتاپ ءوتتى كوميتەتتە.
استانا قالاسى بويىنشا ساۋدا جانە تۇتىنۋشىلار قۇقىعىن قورعاۋ دەپارتامەنتى ەسكە سالادى: تاۋار جاساۋعا نەمەسە قىزمەت كورسەتۋگە شارت جاساسقان كەزدە تۇتىنۋشىلارعا شارت تالاپتارىمەن، ونىڭ ىشىندە مىندەتتەمەلەردىڭ ورىندالۋ مەرزىمدەرىمەن، قۇنىمەن جانە اقشانى قايتارۋ تارتىبىمەن مۇقيات تانىسۋعا كەڭەس بەرىلەدى.
مىندەتتەمەلەردىڭ ورىندالۋ مەرزىمى بۇزىلعان جاعدايدا تۇتىنۋشىعا ورىنداۋشىعا ناقتى تالاپتاردى كورسەتىپ، جازباشا شاعىمدى ۋاقتىلى جىبەرۋ جانە ونىڭ جىبەرىلگەنى مەن الىنعانىن راستايتىن قۇجاتتى ساقتاۋ ۇسىنىلادى.
ءوز قۇقىقتارىن قورعاۋ ءۇشىن شارتتى، تولەمدى راستايتىن قۇجاتتاردى، ورىنداۋشىمەن حات الماسۋدى، تاۋاردىڭ بەرىلگەنى نەمەسە بەرىلمەگەنى تۋرالى قۇجاتتاردى، سونداي-اق داۋلى جاعدايدىڭ ءمان-جايىن راستايتىن باسقا دا ماتەريالداردى ساقتاۋ ماڭىزدى.