استانا تۇرعىندارى الەۋمەتتىك جەلىلەردە بەيمالىم سيمپتومدارى بار سىرقاتقا جاپپاي شاعىمدانۋدا: جوتەلدەن بولەك، قالا تۇرعىندارى اۋىزدىڭ قۇرعاۋىن جانە كوزدىڭ قىشۋىن بايقاعان، دەپ حابارلايدى infohub.kz سايتى.
Threads جەلىسىندەگى aaliya_23 لاقاپ اتىمەن تىركەلگەن قولدانۋشى قالا بويىنشا «ۆيرۋس جۇرگەنىن» جازدى. «السىزدىك، سيرەك قۇرعاق جوتەل، توقتاۋسىز تۇشكىرۋ جانە كوز قىشۋى. كىمدە وسىلاي؟ كۇزدە اللەرگيا بولۋى ەكىتالاي شىعار؟» — دەپ جازدى قازاقستاندىق.
پىكىرلەردە ەلوردا تۇرعىندارى ۇقساس سيمپتومداردى بايقاعاندارىن راستايدى. سونىمەن قاتار قالا تۇرعىندارى مۇنى اللەرگيا دەپ سەنبەيتىندىكتەرىن ايتىپ، جاڭا ۆيرۋستىڭ پايدا بولۋىن بولجاۋدا.
NUR.KZ تىلشىسىنە دەنساۋلىق ساقتاۋ مينيسترلىگىنىڭ سانيتارلىق-ەپيدەميولوگيالىق باقىلاۋ كوميتەتى حابارلاعانداي، قىركۇيەك ايىنىڭ باسىنان باستاپ قازاقستاندا كۇزگى-قىسقى ماۋسىمعا دايىندىق اياسىندا جرۆي، تۇماۋ جانە COVID-19-عا ەپيدەميولوگيالىق مونيتورينگ جۇرگىزىلۋدە.
«بۇل كەزەڭدە اۋا رايىنىڭ كۇرت وزگەرۋى دە ورىن الادى، بۇل رەسپيراتورلىق ۆيرۋستىق ينفەكسيالاردىڭ تارالۋىنا ىقپال ەتۋى مۇمكىن. قازىرگى تاڭدا بۇرىن بەلگىسىز جاڭا ۆيرۋستار انىقتالعان جوق. سونىمەن قاتار ءبىر سيمپتومدار بويىنشا ناقتى ۆيرۋستى انىقتاۋ مۇمكىن ەمەس. سوندىقتان اۋرۋ بەلگىلەرى پايدا بولعان كەزدە ءوزىن-وزى ەمدەۋمەن اينالىسپاي، تەكسەرۋ مەن مامان كەڭەسىن الۋ ءۇشىن مەديسينالىق ۇيىمعا جۇگىنۋ قاجەت»، — دەدى ۆەدومستۆودا.
الدىن الۋ شاراسى رەتىندە ازاماتتارعا ءۇي-جايلاردى جۇيەلى تۇردە جەلدەتۋ، قول تازالىعىن ساقتاۋ، اۋرۋ بەلگىلەرى بار ادامدارمەن تىعىز بايلانىستان اۋلاق بولۋ، قاجەت بولعان جاعدايدا ادام كوپ جينالاتىن جەرلەردە ماسكا كيۋ جانە جرۆي سيمپتومدارى پايدا بولعاندا مۇمكىندىگىنشە ۇيدە قالۋ ۇسىنىلادى.
«جوعارى تەمپەراتۋرا، ايقىن السىزدىك، تىنىس الۋدىڭ قيىنداۋى نەمەسە جالپى جاعدايدىڭ ناشارلاۋى كەزىندە دەر كەزىندە مەديسينالىق كومەككە جۇگىنۋ قاجەت»، — دەپ ەسكە سالدى كوميتەتتە.