استانانىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى الەۋمەتتىك جەلىدە بىلاپيرات سوزدەر ايتىپ، ەسىرتكى زاتىن كورسەتىپ تۇتىنعان بەينەجازبا جاريالاعان ەر ادامنىڭ ءىسىن قارادى. سوت وتىرىسىنىڭ قورىتىندىسى بويىنشا وعان 20 تاۋلىككە قاماۋ تۇرىندەگى اكىمشىلىك جازا تاعايىندالدى، دەپ حابارلايدى infohub.kz سايتى.
استانا سوتتارىنىڭ رەسمي Telegram-ارناسىندا جازىلعانداي، 2026 جىلعى 19 قىركۇيەكتە سوت اكىمشىلىك قۇقىق بۇزۋشىلىق تۋرالى كودەكستىڭ 434-بابىنىڭ 1-بولىگى (ۇساق بۇزاقىلىق) جانە 440-1-بابىنىڭ 1-بولىگى (ەسىرتكى زاتىن مەديسينالىق ەمەس ماقساتتا تۇتىنۋ) بويىنشا ماتەريالداردى قارادى.
وتىرىس بارىسىندا ەر ادام ءوزىنىڭ الەۋمەتتىك جەلىدەگى پاراقشاسىندا بەينەجازبا جاريالاعانى، وندا ءوزىن دورەكى ۇستاپ، بىلاپيرات سوزدەر ايتىپ، وزىنە كەلمەگەن كليەنتكە قاراتا سويلەگەنى انىقتالدى. سونىمەن قاتار ۆيدەودا ول جاسىل ءتۇستى زاتتىڭ جانعان بۋىن كورسەتىپ دەمالعان.
2026 جىلعى 18 قىركۇيەكتە مەديسينالىق كۋالاندىرۋ ناتيجەسىندە ەر ادامنىڭ ەسىرتكى زاتىن مەديسينالىق ەمەس ماقساتتا تۇتىنعانى انىقتالدى. قۇقىق بۇزۋشىلىقتاردى استانا قالالىق پوليسيا دەپارتامەنتى 2026 جىلعى 18 قىركۇيەكتە الەۋمەتتىك جەلىلەردى مونيتورينگىلەۋ بارىسىندا انىقتاعان.
سوت وتىرىسىندا ەر ادام كىناسىن مويىندادى. ول بەينەجازبانى جازدىڭ ورتاسىندا جاريالاعانىن، ناقتى كۇنىن ەسىنە تۇسىرە المايتىنىن ءتۇسىندىردى. ەسىرتكى زاتىن ۇستالعانعا دەيىن 3-4 كۇن بۇرىن تۇتىنعانىن، كەلەسى كۇنى پوليسيا بولىمىنە جەتكىزىلگەنىن ايتتى.
جاسالعان قۇقىق بۇزۋشىلىقتاردىڭ ءمان-جايى ءىس ماتەريالدارىمەن، ونىڭ ىشىندە ەر ادامنىڭ ءوز تۇسىنىكتەمەلەرىمەن، اكىمشىلىك قۇقىق بۇزۋشىلىق تۋرالى حاتتامالارمەن، بەينەجازبامەن جانە مەديسينالىق كۋالاندىرۋ قورىتىندىسىمەن راستالدى.
جاسالعان قۇقىق بۇزۋشىلىقتاردىڭ جيىنتىعىن ەسكەرە وتىرىپ، ەر ادامعا تۇپكىلىكتى 20 تاۋلىككە قاماۋ تۇرىندەگى اكىمشىلىك جازا تاعايىندالدى. قاۋلى زاڭدى كۇشىنە ەنگەن جوق.