استانا تۇرعىنى ءۇيىنىڭ جانىندا تۇنگى ۋاقىتتا فەيەرۆەرك اتىپ، اكىمشىلىك جاۋاپكەرشىلىككە تارتىلدى، دەپ حابارلايدى infohub.kz سايتى.
استانا قالاسى سوتتارىنىڭ ءباسپاسوز قىزمەتىنىڭ مالىمەتىنشە، 4 قىركۇيەكتە استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى اكىمشىلىك قۇقىق بۇزۋشىلىق تۋرالى كودەكستىڭ 434-بابىنىڭ 1-بولىگىنە (ۇساق بۇزاقىلىق) سايكەس ازامات س.-عا قاتىستى ءىستى قارادى.
ءىس ماتەريالدارى بويىنشا، 2026 جىلعى 4 قىركۇيەكتە ساعات 00:03 شاماسىندا ازامات س. ءۇيىنىڭ جانىنداعى قوعامدىق ورىندا بىرنەشە رەت پيروتەحنيكالىق بۇيىمداردى اتىپ، كۇشتى دىبىستىق جانە جارىق ەففەكتىلەرىن تۋدىرعان. وسى ارەكەتتەرىمەن ول قوعامدىق ءتارتىپ پەن ازاماتتاردىڭ تىنىشتىعىن بۇزىپ، اينالاسىنداعىلارعا قۇرمەتسىزدىك كورسەتكەن.
سوت وتىرىسىندا س. كىناسىن تولىق مويىنداپ، ىستەگەنىنە وكىنەتىنىن ءبىلدىردى. قۇقىق بۇزۋشىلىق جاعدايى وقيعانىڭ بەينەجازباسىمەن راستالدى.
اقبتك-نىڭ 434-بابى 1-بولىگىنىڭ سانكسياسى 20 اەك (86 500 تەڭگە) مولشەرىندە ايىپپۇل، 20-دان 60 ساعاتقا دەيىنگى مەرزىمگە قوعامدىق جۇمىستار نەمەسە 5 تاۋلىكتەن 10 تاۋلىككە دەيىنگى مەرزىمگە اكىمشىلىك قاماۋعا الۋدى كوزدەيدى.
قۇقىق بۇزۋشىلىق سيپاتىن جانە ونىڭ قوعامدىق ءتارتىپتى بۇزۋعا باعىتتالعانىن ەسكەرە وتىرىپ، سوت س.-عا بەس تاۋلىك مەرزىمگە اكىمشىلىك قاماۋعا الۋ تۇرىندەگى اكىمشىلىك جازا تاعايىندادى. قاۋلى زاڭدى كۇشىنە ەنگەن جوق.