استاناداعى ۇيلەنۋ تويى بىرنەشە كولىكتىڭ اكىمشىلىك حاتتاماسىمەن جانە ايىپپۇل تۇراعىنا قويىلۋىمەن اياقتالدى: پوليسەيلەر جول قوزعالىسى ەرەجەلەرىن ورەسكەل بۇزعان كورتەجدى انىقتادى، دەپ حابارلايدى infohub.kz سايتى.
استانا قالالىق پوليسيا دەپارتامەنتى Instagram-پاراقشاسىندا ءمالىم ەتكەندەي، ۇيلەنۋ كورتەجىنىڭ بەس كولىگى جول قوزعالىسى ەرەجەلەرىن بۇزعان. جۇرگىزۋشىلەرگە اپاتتىق جاعداي تۋعىزعانى، سونداي-اق جولاۋشىلار مەن جۇكتەردى تاسىمالداۋ ەرەجەلەرىن بۇزعانى ءۇشىن اكىمشىلىك حاتتاما تولتىرىلدى. كولىكتەردىڭ ءوزى ايىپپۇل تۇراعىنا قويىلدى.
«سونىمەن قاتار پوليسەيلەر قوزعالىس كەزىندە كولىك تەرەزەسىنەن شىعىپ، شۋ شىعارىپ، ءقاۋىپسىز قوزعالىسقا كەدەرگى كەلتىرگەن 21 جاستاعى ءۇش جولاۋشىنى انىقتادى. جاس جىگىتتەرگە جاياۋ جۇرگىنشىلەر مەن وزگە دە جول قوزعالىسىنا قاتىسۋشىلاردىڭ قوزعالىس ەرەجەلەرىن بۇزعانى، سونداي-اق ۇساق بۇزاقىلىق جاساعانى ءۇشىن اكىمشىلىك حاتتاما تولتىرىلدى. ۇشەۋى دە ۋاقىتشا ۇستاۋ بولمەسىنە قامالدى. ولارعا قاتىستى ماتەريالدار سوتقا جىبەرىلدى»، — دەدى پوليسيادا.
استانا پوليسيا دەپارتامەنتى مەرەكەلىك شارانىڭ جول قوزعالىسىنا قاتىسۋشىلاردى بەلگىلەنگەن ەرەجەلەردى ساقتاۋدان بوساتپايتىنىن ەسكە سالادى. جۇرگىزۋشىلەرگە، جولاۋشىلارعا جانە قوزعالىستىڭ باسقا دا قاتىسۋشىلارىنا ءقاۋىپ توندىرەتىن كەز كەلگەن ارەكەت زاڭدا كوزدەلگەن جاۋاپكەرشىلىككە اكەپ سوعۋى مۇمكىن.