استانادا قىلمىستىق ىستەر جونىندەگى اۋدانارالىق سوت ترانسۇلتتىق ۇيىمداسقان قىلمىستىق توپقا قاتىستى ۇكىم شىعاردى: 24 سوتتالۋشى كىنالى دەپ تانىلىپ، ءارقايسىسىنا 8 جىلدان باس بوستاندىعىنان ايىرۋ جازاسى تاعايىندالدى. بۇل تۋرالى infohub.kz سايتى حابارلايدى.
قاراعاندى وبلىسى پروكۋراتۋراسىنىڭ رەسمي سايتىندا ءمالىم بولعانداي، مەملەكەتتىك ايىپتاۋشىلار دالەلدەمەلەردى جان-جاقتى ءارى وبەكتيۆتى زەرتتەۋدى قامتاماسىز ەتتى.
سوت انىقتاعانداي، قاتىسۋشىلار كەلىسىپ ارەكەت ەتكەن، ءارقايسىسىنا بەلگىلى ءبىر ءرول جۇكتەلگەن، ال ولاردىڭ ارەكەتتەرىن ۇيىمداستىرۋشىلار ۇيلەستىرىپ وتىرعان. قاتىسۋشىلاردىڭ كوبىسى قازاقستانعا رەسەيدەن كەلگەن. كەيبىرەۋلەرى ۇيىمداستىرۋشىلاردىڭ نۇسقاۋىمەن جابدىق الۋ ءۇشىن رەسەيگە بارىپ تۇرعان.
ورىنداۋشىلاردى نەگىزىنەن Telegram ارقىلى ىزدەگەن. ولارعا بەلگىلى ءبىر قالاعا كەلۋ، تۇرعىن ءۇي جالداۋ، SIM-box الۋ نەمەسە جەتكىزۋ، جابدىقتى ينتەرنەتكە قوسۋ، قازاقستاندىق وپەراتورلاردىڭ SIM-كارتالارىن ورناتۋ جانە ولاردىڭ ۇزدىكسىز جۇمىسىن قامتاماسىز ەتۋ تاپسىرىلعان. وسى ءۇشىن قاتىسۋشىلار تاۋلىگىنە 50-دەن 100 اقش دوللارىنا دەيىن اقشالاي سىياقى العان.
نەگىزگى دالەلدەمەلەر سوتتالعانداردىڭ تەلەفوندارىنان تابىلعان Telegram حات الماسۋلارى بولدى. ولاردا جابدىقتى ورناتۋ جانە وعان قىزمەت كورسەتۋ، SIM-كارتالاردى اۋىستىرۋ، تاپسىرمالاردى ورىنداۋ جانە ۇيلەستىرۋشىلەرگە ەسەپ بەرۋ جونىندەگى نۇسقاۋلىقتار بولعان.
"SIM-box-قا قوسىلعان تەلەفون نومىرلەرى ارقىلى ازاماتتارعا الاياقتىق قوڭىراۋلار جاسالعانى انىقتالدى. قىلمىسكەرلەر مەملەكەتتىك ورگانداردىڭ، بانكتەردىڭ، "قازپوشتا" اق جانە باسقا دا ۇيىمداردىڭ قىزمەتكەرلەرى رەتىندە تانىستىرىلىپ، ازاماتتاردان راستاۋ كودتارىن الىپ، ولاردى نەسيە راسىمدەۋگە جانە اقشا اۋدارۋعا كوندىرگەن. سوتتالۋشىلار كىناسىن جوققا شىعارعانىنا قاراماستان، پروكۋراتۋرا ۇسىنعان دالەلدەمەلەر سوتتالۋشىلاردىڭ ۇيىمداسقان قىلمىستىق قىزمەتكە قاتىسىن راستادى"، - دەدى قاداعالاۋ ورگانىندا.
قازىرگى تاڭدا ۇكىم زاڭدى كۇشىنە ەنگەن جوق.