استانادا پوليسيا زاڭسىز توپىراق الۋعا قارسى كۇرەستى جالعاستىرۋدا. بۇل قورشاعان ورتاعا ۇلكەن زيان كەلتىرىپ، تابيعي لاندشافتتى وزگەرتەدى. نۇرا اۋدانىندا تاعى ءبىر زاڭسىز جەر قويناۋىن پايدالانۋ فاكتىسى انىقتالدى. وندا توپىراقتى شىعارۋ ءۇشىن جۇك كولىكتەرى مەن ارنايى تەحنيكا پايدالانىلعان. تەكسەرۋ قورىتىندىسى بويىنشا بارلىق كولىك قۇرالدارى ارنايى تۇراققا جىبەرىلدى. بۇل تۋرالى infohub.kz حابارلايدى.
ەلوردادا زاڭسىز توپىراق الۋ دەرەكتەرىن انىقتاۋ جانە جولىن كەسۋ بويىنشا جۇيەلى جۇمىس جالعاسۋدا. پوليسيا مۇنداي بۇزۋشىلىقتار قورشاعان ورتاعا ەلەۋلى زيان كەلتىرىپ، تابيعي لاندشافتتى وزگەرتەتىنىن جانە قالانىڭ ەكولوگيالىق جاعدايىنا كەرى اسەر ەتەتىنىن اتاپ ءوتتى.
قۇقىق قورعاۋ ورگاندارىنىڭ مالىمەتىنشە، جەر ۋچاسكەلەرىن ءوز بەتىنشە يگەرۋ تەرەڭ شۇڭقىرلاردىڭ پايدا بولۋىنا اكەلەدى. ولار ۋاقىت وتە كەلە سۋعا تولىپ، جەردىڭ تابيعي بەدەرى بۇزىلادى، توپىراقتىڭ جاعدايى ناشارلايدى جانە قوسىمشا ەكولوگيالىق قاۋىپتەر تۋىندايدى.
«"102" ارناسىنا كەلىپ تۇسكەن حابارلامادان كەيىن زاڭسىز جەر قويناۋىن پايدالانۋدىڭ تاعى ءبىر فاكتىسى انىقتالدى. مالىمەت بويىنشا، زاڭسىز توپىراق ءوندىرۋ جانە شىعارۋ نۇرا اۋدانىندا، قارقارالى كوشەسىنە جاقىن ورنالاسقان اتشابار ماڭىندا جۇرگىزىلگەن»، — دەدى ەلوردالىق پوليسيا دەپارتامەنتىندە.
وقيعا ورنىنا كەلگەن پوليسيا قىزمەتكەرلەرى ارنايى تەحنيكا مەن جۇك كولىكتەرىن پايدالانىپ توپىراقتى تيەۋ جانە تاسىمالداۋمەن اينالىسقان ءبىر توپ ادامدى انىقتادى.
«تەكسەرۋ بارىسىندا پوليسەيلەر 22، 26 جانە 39 جاستاعى ازاماتتار باسقارعان ءۇش Shacman جۇك كولىگىن انىقتادى. سونداي-اق، ورىننان مەملەكەتتىك تىركەۋ نومەرى جوق شىنجىر تاباندى ەكسكاۆاتور تابىلدى. ارنايى تەحنيكانى 30 جاستاعى جۇرگىزۋشى باسقارعان. تاعى ءبىر Chery Tiggo كولىگى انىقتالىپ، ونى 35 جاستاعى ازامات جۇرگىزگەن»، — دەدى استانا پوليسياسىندا.
قۇقىق بۇزۋشىلىق جاساۋ كەزىندە پايدالانىلعان بارلىق كولىك قۇرالدارى كوممۋنالدىق ارنايى تۇراققا قامالدى. زاڭسىز جەر قويناۋىن پايدالانۋ فاكتىسى بويىنشا قوسىمشا تەكسەرۋ جۇرگىزىلۋدە. كىنالى تۇلعالار قازاقستان رەسپۋبليكاسىنىڭ قولدانىستاعى زاڭناماسىنا سايكەس جاۋاپكەرشىلىككە تارتىلادى.
پوليسيا مۇنداي بۇزۋشىلىقتاردى انىقتاۋ جۇمىسى تۇراقتى نەگىزدە جالعاساتىنىن اتاپ ءوتتى. قۇقىق قورعاۋشىلار ازاماتتار مەن ۇيىمداردى جەر قويناۋىن پايدالانۋ سالاسىنداعى زاڭناما تالاپتارىن ساقتاۋعا، اباتتاندىرۋ ەرەجەلەرىن ورىنداۋعا جانە قورشاعان ورتاعا ۇقىپتى قاراۋعا شاقىردى.