استانادا بەيتانىس ەر ادام بوتەن پاتەرگە كىرىپ، وندا ۇيىقتاپ جاتقان ءۇش كىشكەنتاي بالانىڭ قاسىندا شەشىنىپ جاتىپ قالعان. كەيىن ۇيگە ورالعان اكەسىن ۇرىپ-سوققان. بۇل تۋرالى infohub.kz سايتى حابارلايدى.
وقيعا 2 قىركۇيەكتە بولعان. ونى Threads الەۋمەتتىك جەلىسىندەگى madina_n__s دەگەن پايدالانۋشى اڭگىمەلەپ بەرگەن. ونىڭ ايتۋىنشا، اپكەسى استانادا ءۇش كىشكەنتاي بالاسىمەن — 6، 4 جانە 2 جاستاعى بالالارىمەن تۇرادى. تاڭعى 10:35-تە ايەل جۇمىسقا كەتكەن، بالالار ۇيدە ۇيىقتاپ قالعان. كۇيەۋى جۇمىستان شىعىپ، جاقىندا ۇيگە كەلەتىنىن ايتقاندىقتان، ول پاتەردەن سابىرلى تۇردە شىققان.
شامامەن 11:00-دە اپكەسىنىڭ كۇيەۋى ۇيگە كەلىپ، ەسىك الدىندا بوتەن اياق كيىمدى كورگەن، ال كىرەبەرىس ەسىكتىڭ تۇتقاسى سىنعان ەكەن. الدىمەن ول پاتەردى نەمەسە قاباتتى شاتاستىردىم با دەپ ويلاعان، ءبىراق سىرتقا شىعىپ، ءوز پاتەرىنىڭ جانىندا تۇرعانىن تۇسىنگەن. ەسىكتى اشىپ، ىشتە مۇلدەم بەيتانىس جالاڭاش ەر ادامنىڭ ءۇش كىشكەنتاي بالانىڭ قاسىندا ۇيىقتاپ جاتقانىن كورگەن.
اپكەسىنىڭ كۇيەۋى اۋەلى بەيتانىس ادامدى تىنىش وياتىپ، بالالار شوشىماس ءۇشىن پاتەردەن شىعارۋعا تىرىسقان. الايدا ول كوزىن اشىپ، بىردەن ۇرىپ، سوققى بەرە باستاعان. اپكەسىنىڭ كۇيەۋى قورعانۋعا ءماجبۇر بولعان. ءۇش بالانىڭ اكەسى جاراقات العانى بەلگىلى بولدى.
«بارلىعى بالالاردىڭ كوزىنشە بولدى. ولار قاتتى شوشىپ، جىلاپ، كومەككە شاقىرا باستادى. ايقايعا كورشىلەر جۇگىرىپ كەلدى. ولار بالالاردى وزدەرىنە الىپ كەتىپ، پوليسيا شاقىردى. سودان كەيىن اپكەمە قوڭىراۋ شالىپ، دەرەۋ ۇيگە كەلۋىن ايتتى»، — دەلىنگەن جازبادا.
NUR.KZ تىلشىسىنە استانا قالالىق پوليسيا دەپارتامەنتىنەن حابارلاعانداي، پوليسياعا پاتەردە بەيتانىس ەر ادام بار ەكەنى تۋرالى حابارلاما تۇسكەن. وقيعا ورنىنا پوليسيا قىزمەتكەرلەرى كەلگەن.
«تەكسەرۋ بارىسىندا وقيعاعا قاتىسۋشىلاردىڭ بارلىعى انىقتالدى. الدىن الا بەلگىلى بولعانداي، ىشىمدىك ىشكەن كۇيدەگى ەر ادام كورشى پاتەرگە كىرىپ كەتكەن. بالالار اراسىندا زارداپ شەككەندەر جوق. قازىرگى تاڭدا سوتقا دەيىنگى تەرگەۋ جۇرگىزىلىپ، بولعان وقيعانىڭ بارلىق ءمان-جايى انىقتالۋدا»، — دەلىنگەن حابارلامادا.