استانا قالالىق جەدەل جاردەم ستانساسىنىڭ بۇرىنعى ديرەكتورى بيۋدجەتتەن 443 ملن تەڭگەدەن استام قاراجاتتى جىمقىرعانى ءۇشىن 9 جىلعا باس بوستاندىعىنان ايىرىلدى. ونىمەن بىرگە تاعى ەكى بۇرىنعى قىزمەتكەر دە ناقتى مەرزىمگە سوتتالدى. بۇل تۋرالى infohub.kz سايتى حابارلايدى.
28 شىلدەدە ۇكىمدى استانا قىلمىستىق ىستەر جونىندەگى اۋدانارالىق سوتى جاريالادى.
ءىس ماتەريالدارىنا سايكەس، 2020-2023 جىلدار ارالىعىندا، قازاقستانداعى توتەنشە جاعداي رەجيمى كەزىندە، ستانسا باسشىسى كولىكتىك قامتاماسىز ەتۋ ءبولىمىنىڭ باستىعى جانە باس مەحانيكپەن بىرگە اقشا جىمقىرۋ سحەماسىن ۇيىمداستىرعان. جەدەل جاردەم كولىكتەرىن جوندەۋگە ۇنەمدەۋ جانە تەز جوندەۋ دەگەن سىلتاۋمەن كاسىپورىندا مەنشىكتى تەحنيكالىق قىزمەت كورسەتۋ ستانساسىن اشقان، – دەلىنگەن سوتتىڭ ءباسپاسوز قىزمەتىنىڭ حابارلاماسىندا.
ايىپتالۋشىلار سانيتارلىق كولىكتەرگە ارنالعان قوسالقى بولشەكتەردى زاڭسىز ەسەپتەن شىعارىپ، ناقتى ەشقانداي جۇمىس اتقارماعان مەردىگەرمەن جوندەۋ شارتىن جاساسقان. ناتيجەسىندە كاسىپورىنعا 443 ملن تەڭگەدەن استام زالال كەلتىرىلگەن. سوت انىقتاعانداي، بۇل اقشا يەمدەنىلگەن.
سونىمەن قاتار، ستانسانىڭ تاعى ءبىر قىزمەتكەرى 2023 جىلى قىزمەت بابىن پايدالانىپ، كاسىپورىن مۇلكىن 268 مىڭ تەڭگەدەن استام سوماعا جىمقىرعان.
بۇرىنعى ديرەكتور جانە ونىڭ ەكى ارىپتەسى كىنالارىن مويىنداماي، اقتاۋدى سۇراعان. الايدا سوت ولاردىڭ قاتىستىلىعى كۋالاردىڭ ايعاقتارىمەن، ساراپتاما قورىتىندىلارىمەن، زاتتاي دالەلدەمەلەرمەن جانە ءىستىڭ باسقا دا ماتەريالدارىمەن دالەلدەنگەن دەگەن قورىتىندىعا كەلدى. سوت قىلمىستىڭ توتەنشە جاعداي رەجيمى كەزىندە جاسالعانىن اۋىرلاتاتىن ءمان-جاي دەپ تانىدى. بۇل رەتتە 443 ملن تەڭگە كولەمىندەگى زالال ءالى وتەلمەگەن.
ناتيجەسىندە ستانسانىڭ بۇرىنعى ديرەكتورى مەملەكەتتىك قىزمەتتە لاۋازىمداردى اتقارۋعا ءومىر بويى تىيىم سالىنا وتىرىپ، 9 جىلعا باس بوستاندىعىنان ايىرىلدى. كولىكتىك قامتاماسىز ەتۋ ءبولىمىنىڭ باستىعى مەن باس مەحانيككە دە ءدال وسىنداي ءومىر بويى تىيىم سالىنا وتىرىپ، 8 جىلدان باس بوستاندىعىنان ايىرۋ جازاسى كەسىلدى. ءتورتىنشى ايىپتالۋشى 2 جىلعا باس بوستاندىعىن شەكتەۋ جازاسىن الدى، الايدا امنيستيا بويىنشا جازادان بوساتىلدى. سوت ونىڭ كىناسىن مويىنداعانىن، كەلتىرىلگەن زالالدى وتەگەنىن جانە جابىرلەنۋشى تاراپپەن تاتۋلاسقانىن ەسكەردى.
سونداي-اق سوت سوتتالعانداردان جابىرلەنۋشىنىڭ پايداسىنا 443 ملن تەڭگەدەن استام ءوندىرىپ الۋ تۋرالى ازاماتتىق تالاپتى تولىق قاناعاتتاندىردى. ۇكىم ءالى زاڭدى كۇشىنە ەنگەن جوق.
بۇعان دەيىن «كۋرسيۆ» باسىلىمى باس پروكۋراتۋرانىڭ 80 ملن تەڭگەدەن استام قاراجاتتى ۇرلاعان بۋحگالتەرگە قاتىستى امنيستيانىڭ كۇشىن جويۋعا قول جەتكىزگەنى تۋرالى جازعان بولاتىن.