استاناداعى ۇلتتىق عىلىمي مەديسينالىق ورتالىعىنىڭ (UMC) دارىگەرلەرى 60 جاستاعى ەر ادامعا جۇرەك ترانسپلانتاسياسىن ءساتتى جاسادى. مارقۇمنىڭ وتباسى كەلىسىم بەرگەننەن كەيىن دونورلىق مۇشە بىرنەشە ساعات ىشىندە جەتكىزىلىپ، وتىرعىزىلدى، دەپ حابارلايدى infohub.kz.
دەنساۋلىق ساقتاۋ مينيسترلىگىنىڭ ناقتىلاۋىنشا، 14 شىلدەدەن 15 شىلدەگە قاراعان ءتۇنى كوپبەيىندى مەديسينالىق ورتالىقتا الەۋەتتى دونور انىقتالدى. تۋىستارى كەلىسىم بەرگەننەن كەيىن دونورلىق پروسەسس تولىق ۇيىمداستىرىلدى. رەسيپيەنت – 1966 جىلى تۋعان ەر ادام، ۇزاق ۋاقىت كۇتۋ تىزىمىندە بولعان. دارىگەرلەر ونىڭ جاعدايى وتادان كەيىنگى كەزەڭگە سايكەس كەلەتىنىن ايتادى.
مينيسترلىك دونوردىڭ وتباسىنا قابىلدانعان شەشىم ءۇشىن، ترانسپلانتاسيانى جۇرگىزگەن بارلىق دارىگەرلەرگە، سونداي-اق جۇرەكتى ەلورداعا جەدەل جەتكىزگەن سانيتارلىق اۆياسيا قىزمەتكەرلەرىنە العىس ءبىلدىردى.
ۆەدومستۆونىڭ مالىمەتىنشە، قازاقستاندا ومىرلىك ماڭىزى بار مۇشەلەردى ترانسپلانتاسيالاۋدى 4،7 مىڭنان استام ادام، ونىڭ ىشىندە 125 بالا كۇتىپ وتىر. ولاردىڭ ىشىندە بۇيرەك ترانسپلانتاسياسى 4 208 ناۋقاسقا، باۋىر – 293، جۇرەك – 208، وكپە – 30، وكپە-جۇرەك كەشەنى – 5 ادامعا قاجەت. «ءاربىر قايتىس بولعاننان كەيىنگى دونورلىققا كەلىسىم – ترانسپلانتاسيا جالعىز ەمدەۋ ءتاسىلى بولىپ وتىرعان ادامداردىڭ ءومىرىن ساقتاۋ مۇمكىندىگى»، – دەپ اتاپ ءوتتى مينيسترلىكتە.
بۇعان دەيىن الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا اۋىر ميترالدى رەگۋرگيتاسياسى بار ناۋقاستارعا TEER تەحنولوگياسى بويىنشا ءبىرقاتار از ءينۆازيۆتى وتالار جاسالعانى حابارلانعان بولاتىن. ارالاسۋلار كەۋدە قۋىسىن اشپاي جانە جاساندى قان اينالىمىنسىز جۇمىس ىستەپ تۇرعان جۇرەكتە جۇرگىزىلگەن.