تاۋەلسىز كوميسسيا ەلورداداعى بىرنەشە مەكتەپتە جۇرگىزگەن تەكسەرىس بارىسىندا ءبىرقاتار بۇزۋشىلىقتاردى انىقتادى.
«ءبىلىم باسقارماسىنىڭ باستاماسىمەن تاۋەلسىز كوميسسيا جاساقتالىپ، ەلورداداعى بىرنەشە مەكتەپتە تەكسەرىس وتكىزىلدى. بۇگىن تەكسەرىستەر كەزىندە تالاپقا ساي كەلمەيتىن تۇستار بويىنشا حاتتاما تولتىرىلىپ، سونىڭ نەگىزىندە شارا قولدانىلادى»، - دەيدى استانا قالالىق ءبىلىم باسقارماسىنىڭ ءباسپاسوز حاتشىسى جازيرا اسانوۆا.
ونىڭ سوزىنە قاراعاندا، وقۋ جىلىنىڭ باسىنان بەرى مەكتەپ ديرەكتورلارىنا مەكتەپ اسحاناسىنىڭ جاعدايىن جاقسارتۋعا قاتىساتىن ساراپشىلىق كوميسسيالار قۇرۋ تاپسىرىلعان.
«مەكتەپ اسحاناسىنداعى ءدام-تاماقتىڭ ساپاسىن باقىلايتىن اتا-انالار كوميسسيالارى ءقازىردىڭ وزىندە بار. ەرەجە بۇزۋشىلىق جاعدايى انىقتالسا، حاتتاما تولتىرىلىپ، ازىق-ت ۇلىك جەتكىزۋشىگە ونى رەتتەۋگە مەرزىم بەرىلەدى. ەگەر رەتتەمەسە، مەكتەپ سول حاتتاما نەگىزىندە كەلىسىمشارتتى سوزباۋىنا، ەگەر تالاپ ورەسكەل بۇزىلسا، كەلىسىمشارتتى بۇزۋىنا بولادى»، - دەيدى ج. اسانوۆا.
سونداي-اق، ازىق ساپاسىنىڭ تالاپقا ساي ەمەس ەكەنى انىقتالعان جاعدايدا: 55-68-74، 55-74-67 نومىرلەرىنە حابارلاسۋعا بولادى.
بۇرىن جۋرناليست گۇلبانۋ ابەنوۆا Facebook-تەگى جازباسىندا مەكتەپ اسحاناسىندا بالالارعا بەرىلەتىن تاماقتىڭ ساپاسىن سىنعا العان بولاتىن. بۇدان تىس، مەرزىمى ءوتىپ كەتكەن ازىق-ت ۇلىك ونىمدەرىنىڭ سۋرەتىن جاريالاپ، مايونەز بەن كەچۋپ بۇزىلعان توڭازىتقىشتا ساقتالىپ جاتقانىنا كەيىس بىلدىرگەن.
جازبانى بىرنەشە ساعاتتا مىڭنان استام پايدالانۋشى بولىسكەن، وسى جاعداي جۇرتشىلىق اراسىندا الاڭداۋشىلىق تۋعىزعان.
دەرەككوزى: قازاقپارات