استانادا جەڭىل رەلستى كولىك (لرت) تىرەۋىشتەرىن قالالىق گالەرەياعا اينالدىرۋ ۇسىنىلدى، الايدا بۇل باستاما قالا تۇرعىندارىنىڭ اراسىندا ءتۇرلى پىكىر تۋدىردى، دەپ حابارلايدى infohub.kz سايتى.
Threads الەۋمەتتىك جەلىسىندەگى @tleuzhanovsaken پايدالانۋشىسى جەرگىلىكتى سۋرەتشىلەر مەن جاس اۆتورلاردى تارتا وتىرىپ، لرت تىرەۋىشتەرىن بەزەندىرۋ بويىنشا پيلوتتىق جوبانى باستاۋدى ۇسىندى. ونىڭ ويىنشا، ەسكيزدەر الدىن الا كەلىسىلىپ، سۋرەتتەر ساپالى ورىندالۋى ءتيىس.
مىسال رەتىندە استانالىق بىرنەشە بەزەندىرۋ نۇسقاسىن كورسەتتى. ولاردىڭ بىرىندە تىرەۋىشتەر ۇلتتىق ستيلدەگى قىز پورترەتىمەن، بۇركىت بەينەسىمەن، تابيعات كورىنىستەرىمەن جانە ويۋ-ورنەكتەرمەن بەزەندىرىلگەن. اۆتور جەكەلەگەن سۋرەتتەرمەن شەكتەلمەي، ءلرت-نىڭ بەتون قۇرىلىمدارىنىڭ كادىمگى كورىنىسىن وزگەرتە الاتىن تۇتاس تۋىندىلار توپتاماسىن جاساۋدى ۇسىنادى.
الايدا پىكىرلەردە بۇل يدەيانى ءبارى قولداي قويمادى. كوپتەگەن استانالىقتار اشىق ءتۇستى سۋرەتتەر قالانى ۆيزۋالدى تۇردە شامادان تىس جۇكتەيتىنىن ايتتى، كەيبىرەۋلەر تىرەۋىشتەردى قازىرگى قالپىندا قالدىرعاندى ءجون كورەدى.
«يدەيا جاقسى، ءبىراق بولمايدى. تەحنيكالىق سەبەپتەرمەن تىيىم سالىنعان. اقاۋلار كورىنبەي قالادى»، «وسى ءتۇرلى-تۇستى داقتاردىڭ ءبارى كەرەك ەمەس. شىنىمەن دە شۋ»، «جوق-جوق، قويىڭدار. ءبىر تۇستىلەرى دۇرىس»، «تىرەۋىشتەرگە تيىسپەڭدەر، جۇكتەمەڭدەر. جاقسى كورىنبەيدى»، «بۇل ادەمى ەمەس، تالعامسىز»، – دەپ جازادى پىكىر قالدىرۋشىلار.
قالانىڭ سىرتقى كەلبەتىنەن بولەك، باسقا دا ماسەلەلەرگە الاڭدايتىندار تابىلدى. ءبىر پايدالانۋشىنىڭ پىكىرىنشە، اشىق سۋرەتتەر جۇرگىزۋشىلەردى الاڭداتىپ، تىرەۋىشتەر فوتوسەسسيا ورنىنا اينالىپ، جولداردا قيىندىق تۋعىزۋى مۇمكىن.
«ولاردى قازىرگى قالپىندا قالدىرىڭدار. سۋرەتتەردى ادەتتەگىدەي ۇيلەرگە سالعان دۇرىس. لرت-دە جۇرگىزۋشىلەردى الاڭداتادى، جاستار سۋرەتكە ءتۇسىپ، قوزعالىسقا كەدەرگى كەلتىرەدى. پايدادان گورى زيانى كوپ»، – دەپ اتاپ ءوتتى كوممەنتاتور.
دەگەنمەن كەيبىرەۋلەر يدەيانى قولدادى. ءبىر پايدالانۋشى ءتىپتى تىرەۋىشتەرگە حاندار مەن باتىرلاردىڭ بەينەلەرىن سالۋدى ۇسىندى. ءبىراق ازىرگە تەك يدەيا مەن ۆيزۋالدى ەسكيزدەر تۋرالى عانا ايتىلىپ وتىر. استانا اكىمدىگى لرت تىرەۋىشتەرىن بەزەندىرۋ تۋرالى رەسمي شەشىمدى ءالى جاريالاعان جوق.
بۇعان دەيىن Kursiv LifeStyle الماتىداعى ەسەنتاي وزەنىنىڭ جاعالاۋىن اشىق ءتۇستى سۋرەتتەرمەن بەزەندىرىپ، اينالاسىنداعى اۋماقتى رەتكە كەلتىرە باستاعانىن جازعان ەدى. الايدا جاڭا بەزەندىرۋ بارىنە ۇناي قويمادى. كەيبىر تۇرعىندار سۋرەتتەردى سىنعا الدى. ءبىز سۋرەتتەردىڭ قالاي جاسالاتىنىن جانە جاڭارتۋ توڭىرەگىندە نەلىكتەن داۋ تۋىنداعانىن انىقتادىق.