نيلس بور ينستيتۋتىنىڭ زەرتتەۋشىسى يۋلي كيل حولم مەن DTU Space عالىمى سارا پيرسون باستاعان حالىقارالىق زەرتتەۋ توبى العاش رەت ءبىزدىڭ گالاكتيكادان تىس جەردە شار ءتارىزدى شوعىردان تاراعان جۇلدىز اعىنىن تىركەدى. جۇمىس ناتيجەلەرى "Nature" عىلىمي جۋرنالىندا جاريالاندى. بۇل اشىلىم الەم ماسساسىن زەرتتەۋدىڭ جاڭا ءادىسىنىڭ تيىمدىلىگىن راستادى، دەپ حابارلايدى infohub.kz سايتى.
جۇلدىز اعىنى — يە گالاكتيكانىڭ تارتىلىس كۇشى اسەرىنەن تىعىز شار ءتارىزدى شوعىردان سوزىلىپ شىققان ۇزىن ءارى جىڭىشكە جۇلدىزدار شلەيفى. جارىعى وتە ءالسىز بولعاندىقتان، مۇنداي قۇرىلىمدار بۇرىن تەك قۇس جولىندا عانا زەرتتەلىپ كەلگەن. بۇل نىساندى جارىعى ايرىقشا تومەن ۋلتراديففۋزيالىق UGC9050-Dw1 گالاكتيكاسىنىڭ ىشىنەن بايقاۋ مۇمكىن بولدى.
جۇلدىز اعىندارىنىڭ ءپىشىنى مەن قوزعالىسى گراۆيتاسياعا تىكەلەي تاۋەلدى بولعاندىقتان، ولار جاسىرىن ماسسانىڭ تارالۋىن زەرتتەۋدىڭ بىرەگەي ينديكاتورىنا اينالادى. زەرتتەۋ اۆتورلارى UGC9050-Dw1 گالاكتيكاسىنىڭ جالپى ماسساسىن جاڭادان ەسەپتەپ، وندا الەمدەگى بارلىق زاتتىڭ 85 پايىزىنا دەيىنگى ۇلەسىن قۇرايتىن قاراڭعى ماتەريانىڭ وراسان زور مولشەرى بار ەكەنىن راستادى.
جۇمىس اۆتورلارىنىڭ ايتۋىنشا، بۇل ءادىستى قۇس جولىنان تىس جەردە ءساتتى قولدانۋ استروفيزيكاعا كەڭ مۇمكىندىكتەر اشادى. الداعى ۋاقىتتا "Euclid" جانە "Nancy Grace Roman" عارىش تەلەسكوپتارى باسقا تيپتەگى گالاكتيكالاردان وسىنداي جۇلدىز اعىندارىن تابۋعا مۇمكىندىك بەرەدى. بۇل عالىمدارعا قاراڭعى ماتەريانىڭ تابيعاتىن اشۋعا جاقىنداۋعا كومەكتەسەدى.