قازاقستاندىق UFC وكىلى اسۋ المابايەۆ Real American Freestyle (RAF) ليگاسىندا امەريكاندىق دجونني ديدجۋليۋسپەن ەركىن كۇرەس كەزدەسۋىن وتكىزەدى. جەكپە-جەك 22 تامىزدا كليۆلەندتەگى RAF12 تۋرنيرىندە وتەدى، دەپ حابارلايدى infohub.kz سايتى.
RAF باسىلىمى: «ديدجۋليۋس ءۇشىن ۇيدەگى كەزدەسۋ. دجونني ديدجۋليۋس 22 تامىزدا كليۆلەندتەگى RAF12 تۋرنيرىندە اسۋ الماباەۆپەن كەزدەسەدى»، – دەپ جازدى.
المابايەۆ UFCء-دىڭ ەڭ جەڭىل سالماق دارەجەسىندەگى رەيتينگتە جەتىنشى ورىندا تۇر. سوڭعى جەكپە-جەگىندە ول باكۋدەگى UFC تۋرنيرىندە چارلز دجونسوندى ءۇشىنشى راۋندتا Suloev stretch اۋىرتۋ تاسىلىمەن جەڭدى.
دجونني ديدجۋليۋس – كاسىبي بالۋان. ستۋدەنتتىك كەزىندە وگايو شتاتىنىڭ ۋنيۆەرسيتەتى ءۇشىن ونەر كورسەتىپ، 115 جەڭىسكە، 47 جەڭىلىسكە قول جەتكىزگەن. NCAA چەمپيوناتىنا ءتورت رەت ىرىكتەلىپ، Cliff Keen Las Vegas Invitational تۋرنيرىندە 60 كەلىگە دەيىنگى سالماقتا جەڭىمپاز بولعان. قازىرگى ۋاقىتتا ديدجۋليۋس كليۆلەند مەملەكەتتىك ۋنيۆەرسيتەتىنىڭ كۇرەس كومانداسىندا جاتتىقتىرۋشىنىڭ كومەكشىسى قىزمەتىن اتقارادى.
RAF12 ءتۋرنيرى 22 تامىزدا وتەدى. باستى جەكپە-جەكتە وليمپيادا چەمپيونى دجوردان بارروۋز بەن UFC وكىلى شون برەدي كەزدەسەدى. بىرلەسكەن باستى جەكپە-جەكتە كىلەمگە UFCء-دىڭ بۇرىنعى چەمپيوندارى كولبي كوۆينگتون مەن بەلال مۋحامماد شىعادى.
Real American Freestyle (RAF) ليگاسى – وليمپيادا چەمپيوندارى، جەتەكشى بالۋاندار جانە تانىمال ارالاس جەكپە-جەك وكىلدەرى قاتىساتىن جەكپە-جەكتەر ۇيىمداستىراتىن امەريكاندىق كاسىبي ەركىن كۇرەس ۇيىمى.