كوپ جىلعى كۇتۋ مەن كەيىنگە شەگەرىلگەننەن كەيىن «اتاكەنت» كدس اۋماعىنىڭ تاعدىرى اقىرى بەلگىلى بولدى. رەسمي اقپاراتقا سايكەس، جوندەۋ جۇمىستارى 2026 جىلى باستالىپ، تولىق اياقتالۋى 2027 جىلدىڭ ءۇشىنشى توقسانىنا جوسپارلانعان، دەپ حابارلايدى infohub.kz سايتى.
رەداكسيانىڭ ساۋالىنا جاۋاپ رەتىندە الماتى قوعامدىق كەڭىستىكتەردى دامىتۋ باسقارماسى قازىرگى ۋاقىتتا رەكونسترۋكسيا جوباسى ەسكيزدىك شەشىمدەر ازىرلەۋ ساتىسىندا ەكەنىن مالىمدەدى. جوبالىق-سمەتالىق قۇجاتتاما تۇزەتىلىپ، ساراپتامانىڭ وڭ قورىتىندىسى الىنعاننان كەيىن جۇمىستاردى جۇرگىزۋگە بيۋدجەتتىك ءوتىنىم بەرىلەدى. جوبانىڭ قۇنى ازىرگە جاريالانبايدى.
بوستاندىق اۋدانىنىڭ اكىمى ازامات قالدىبەكوۆ «اتاكەنت» اۋماعى قالاعا تيەسىلى ەكەنىن ءتۇسىندىردى. كەشەننىڭ 54 گەكتارىنىڭ 38 گەكتارى قالالىق جەر بولسا، قالعان ۋچاسكەلەردەگى پاۆيلوندار جەكە مەنشىكتە. «ءبىز اۋماقتىڭ ءوزىن رەكونسترۋكسيالاۋ بويىنشا ۇلكەن جوبامەن كەلەمىز. بۇل جاڭا جوبا بولادى، ول „اتاكەنتتىڭ“ جوعارعى بولىگىن، شىعىس بولىگىن، بوتانيكالىق باققا جاقىن جەردى قامتيدى. بۇل كەشەندى ينفراقۇرىلىم، كەشەندى ساياباق بولادى»، — دەدى اكىم تۇرعىندارمەن كەزدەسۋدە.
جاڭا جوباعا سايكەس، «اتاكەنت» اۋماعىندا ەسكى سۋبۇرقاقتار جوندەلىپ، اللەيالار رەكونسترۋكسيالانىپ، جارىقتاندىرۋ جاڭارتىلادى. سونداي-اق جاڭا بالالار جانە سپورت الاڭدارى، سكەيتپارك پەن پامپ-ترەك پايدا بولادى. اۋماق قوسىمشا كوگالداندىرىلىپ، جاڭا شاعىن ساۋلەت نىساندارى ورناتىلادى، ال قولدانىستاعى اعاشتاردى بارىنشا ساقتاپ قالۋعا ۋادە بەرىلەدى.
«اتاكەنتتى» رەكونسترۋكسيالاۋ تۋرالى اڭگىمە بىرنەشە جىلدان بەرى ايتىلىپ كەلەدى. 2018 جىلى كەشەن اۋماعىنىڭ ءبىر بولىگى كوممۋنالدىق مەنشىككە قايتارىلدى، ال 2022 جىلى اكىمدىك قايتادان جاڭارتۋدى باستاۋعا ۋادە بەردى. 2025 جىلى بيلىك جاڭا جوبانى ۇسىنىپ، جۇمىستاردى باستاۋدى جوسپارلاعان ەدى، الايدا 10،3 ملرد تەڭگەگە تەندەر پروكۋراتۋرا تەكسەرىسىنەن كەيىن كەرى قايتارىلدى.
بۇعان دەيىن Kursiv LifeStyle كەشەنگە كىرەبەرىستەگى الاڭنىڭ قالاي وزگەرگەنىن كورسەتكەن بولاتىن. بۇل ازىرگە اۋماقتى اۋقىمدى رەكونسترۋكسيالاۋعا جاسالعان العاشقى ۇلكەن قادام.