افينادا چەمودان ىشىنەن تابىلعان شوتلانديالىق ايەلدىڭ ولىمىنە قاتىستى ەر ادام ۇستالدى. گرەك پوليسياسىنىڭ مالىمەتىنشە، 26 جاستاعى كۇدىكتى شەتەلدىك. ونىڭ ۇيىنەن تاپانشانىڭ كوشىرمەسى مەن پىشاق تابىلىپ، پوليسيا ونى ابايسىزدا ادام ءولتىرۋ، توناۋ جانە قارۋ زاڭىن بۇزۋ باپتارىمەن ءىس قوزعادى.
38 جاستاعى ەليزابەت-دجەين روسستىڭ ءمايىتىن 18 شىلدەدە افيناداعى كيپسەلي اۋدانىنداعى قاراۋسىز قالعان عيماراتتان قاڭعىباس ەر ادام چەمودان ىشىنەن تاپقان. ول تابىلعانعا دەيىن بەس-جەتى كۇن بۇرىن قايتىس بولعان دەپ ەسەپتەلەدى، دەگەنمەن ونىڭ ۇيالى تەلەفونىنان روسستىڭ اتىنان حابارلامالار جىبەرىلگەنى حابارلانعان. گرەكيانىڭ ۇلتتىق پوليسياسى روسستى ساۋساق ىزدەرى ارقىلى انىقتاعان.
ەدينبۋرگتەن كەلگەن روسس گرەكياعا 26 ماۋسىمدا كىرىپ، الدىمەن پيرەيدەگى دوستارىندا تۇرعان. كەيىن ول گرەك استاناسىنىڭ باسقا بولىگىندەگى امەريكاندىق دوستارىمەن كەزدەسۋگە بارعان دەلىنەدى، ءبىراق بۇل ورىن العانى بەلگىسىز.
پوليسيا كۇدىكتىنى انىقتاۋ ءۇشىن بەينەجازبالاردى تالداعانىن جانە ونىڭ بەيسەنبىدە كىناسىن مويىنداعانىن حابارلادى. كۇدىكتى روسستىڭ دەنەسىن چەمودانعا سالىپ، تابىلعان جەرگە اپارعان دەپ ەسەپتەلەدى. كەيىنگى كۇندەرى ول ونىڭ بانك كارتاسىن پايدالانىپ اقشا شەشىپ العان.
ۇلىبريتانيا سىرتقى ىستەر مينيسترلىگى بۇعان دەيىن: «ءبىزدىڭ ويىمىز ەليزابەتتىڭ وتباسىمەن وسى قيىن كەزەڭدە. ءبىز كونسۋلدىق قولداۋ كورسەتىپ، جەرگىلىكتى بيلىكپەن بايلانىستامىز»، – دەپ مالىمدەگەن. شوتلانديا پوليسياسىنىڭ وكىلى: «ءبىز افينادا شوتلانديالىق ايەلدىڭ قايتىس بولعانىن بىلەمىز جانە گرەكيا بيلىگىمەن بايلانىسىپ جاتىرمىز. قىزمەتكەرلەر ونىڭ وتباسىنا شوتلانديادا قولداۋ كورسەتۋدە»، – دەدى.