اتىراۋ – استراحان تراسساسىندا ءۇش جىل بۇرىن بولعان قايعىلى وقيعا ءۇش ادامنىڭ ءومىرىن قيعان جول اپاتىنىڭ كىنالىسىنە ناقتى مەرزىم تاعايىندالدى، دەپ حابارلايدى infohub.kz وبلىستىق پروكۋراتۋرانىڭ ءباسپاسوز قىزمەتىنە سىلتەمە جاساپ.
جول-كولىك وقيعاسى 2023 جىلعى 21 تامىزدا بولدى. جۇرگىزۋشى جول قوزعالىسى ەرەجەسىن بۇزىپ، سالدارىنان ءۇش ادام قازا تاۋىپ، تاعى بىرنەشە ادام ءارتۇرلى دارەجەدە جاراقات الدى.
قىلمىستىق ءىس سوتقا 2024 جىلى جىبەرىلدى. الايدا بۇرىن شىعارىلعان سوت شەشىمدەرى قايتا قارالىپ، كۇشى جويىلىپ، ءىستىڭ قارالۋى ۇزارىپ كەتتى.
2026 جىلعى 23 اقپاندا جاڭا سوت قاراۋىنىڭ قورىتىندىسى بويىنشا جۇرگىزۋشى قازاقستان رەسپۋبليكاسى قىلمىستىق كودەكسىنىڭ 345-بابىنىڭ 4-بولىگى بويىنشا كىنالى دەپ تانىلدى. وعان كولىك قۇرالىن باسقارۋ قۇقىعىنان جەتى جىلعا ايىرا وتىرىپ، بەس جىلعا باس بوستاندىعىنان ايىرۋ جازاسى كەسىلدى.
2026 جىلعى 4 ماۋسىمدا اتىراۋ وبلىستىق سوتىنىڭ قىلمىستىق ىستەر جونىندەگى سوت القاسى ۇكىمدى وزگەرىسسىز قالدىردى.
جىل باسىنان بەرى وبلىستا اۋىر زارداپتارعا اكەپ سوققان جول قوزعالىسى ەرەجەسىن ورەسكەل بۇزۋ دەرەگى بويىنشا 18 ادام ناقتى باس بوستاندىعىنان ايىرۋ جازاسىنا سوتتالدى.