استەك وركەنيەتىنىڭ تاريحىن جانە يسپان كونكيستادورلارى كەلگەننەن كەيىنگى قۇلدىراۋىن پيكتوگراممالارمەن باياندايتىن كونە قولجازبا 186 جىلدان كەيىن مەكسيكادا العاش رەت كوپشىلىككە قويىلادى، دەپ حابارلايدى infohub.kz سايتى.
«اسكاتيتلان كودەكسى» دەپ اتالاتىن بۇل قولجازبا 1898 جىلدان بەرى فرانسيانىڭ ۇلتتىق كىتاپحاناسىندا ساقتالىپ كەلەدى. الايدا ول بۇعان دەيىن دە ونداعان جىلدار بويى مەكسيكانىڭ شەگىنەن تىس جەردە بولعان.
ول XVI عاسىردا — كونكيستادورلار قازىرگى مەكسيكا اۋماعىنا كەلگەننەن كەيىن بىرنەشە جىل وتكەن سوڭ سالىنعان دەپ ەسەپتەلەدى. زەرتتەۋشىلەر ونى استەكتەر تاريحىنىڭ ەڭ قۇندى ءارى مازمۇندى بايانداۋلارىنىڭ ءبىرى سانايدى.
فرانسيا «اسكاتيتلان كودەكسىن» فرانسيا مەن مەكسيكا اراسىنداعى قارىم-قاتىناستىڭ 200 جىلدىعىنا وراي مەكسيكاعا ۋاقىتشا بەردى.
وعان جاۋاپ رەتىندە مەكسيكا تاعى ءبىر باعا جەتپەس قۇجات — «بوتۋريني كودەكسىن» فرانسيادا كورمەگە قويۋ ءۇشىن جىبەرۋگە كەلىستى.
«بوتۋريني كودەكسىندەگى» پيكتوگراممالار استەكتەردىڭ، ياعني مەشيكالاردىڭ اتامەكەنىنەن تەسكوكو كولىنىڭ جاعالاۋىنا قونىس اۋدارۋىن باياندايدى. ءدال سول جەردە ولار تەنوچتيتلان قالاسىن تۇرعىزعان.
ەكى كودەكستى ۋاقىتشا ايىرباستاۋ تۋرالى كەلىسىمدى مەكسيكا پرەزيدەنتى كلاۋديا شەينباۋم مەن فرانسيا پرەزيدەنتى ەممانۋەل ماكرون وتكەن جىلى ماكروننىڭ مەكسيكاعا ساپارى كەزىندە جاساسقان.
مەكسيكا وتكەن عاسىرلاردا ەلىنەن اكەتىلگەن تاريحي جادىگەرلەردىڭ قايتارىلۋىنا كوپتەن بەرى كۇش سالىپ كەلەدى. مەكسيكانىڭ سىرتقى ىستەر مينيسترلىگىنىڭ مالىمەتىنشە، بىلتىر 2 مىڭنان استام نىسان وتانىنا قايتارىلعان.
«اسكاتيتلان كودەكسى» بەيسەنبى كۇنىنەن باستاپ مەحيكو قالاسىنداعى ۇلتتىق انتروپولوگيا مۇراجايىندا قويىلادى.