اتىراۋ وبلىسىندا ەرەكشە قاجەتتىلىگى بار ادامدارعا ارنالعان قىزمەتتەردى سيفرلاندىرۋ باستالدى: ەندى مامانداندىرىلعان كولىكتى InvoTaxi ءموبيلدى قوسىمشاسى ارقىلى شاقىرۋعا بولادى. پيلوتتىق جوبانىڭ باستالعانىن وبلىس اكىمدىگى حابارلادى، دەپ جازادى infohub.kz.
جەرگىلىكتى اتقارۋشى ورگاننىڭ تۇسىندىرۋىنشە، جۇيە وتىنىمدەردى جۇرگىزۋشىلەر اراسىندا ءوز بەتىنشە بولەدى، ال جولاۋشىلار كولىكتى كارتادان باقىلاي الادى. قوسىمشانىڭ ينتەرفەيسى كورۋ قابىلەتى بۇزىلعان ادامدارعا بەيىمدەلگەن.
جوبا ساپارلاردى ىڭعايلى ءارى ءقاۋىپسىز ەتىپ قانا قويماي، جۇمىس ورىندارىن دا اشادى: تاپسىرىستاردىڭ مارتەبەسىن جانە مارشرۋتتاردىڭ ساقتالۋىن باقىلاۋ قۇرالدارى قاراستىرىلعان. ديسپەچەر قىزمەتىنە مۇگەدەكتىگى بار ادامداردى الۋ جوسپارلانۋدا.
ءقازىر InvoTaxi پيلوتتىق رەجيمدە جۇمىس ىستەپ جاتىر: 300-گە دەيىن ءوتىنىم وڭدەلدى، جۇيەگە ازىرگە ءجۇز پايدالانۋشى عانا قوسىلعان. سىناق اياقتالعان سوڭ سەرۆيسكە 1،2 مىڭنان استام پايدالانۋشى قوسىلادى.
ينۆاتاكسي جۇرگىزۋشىلەرىنە قاتاڭ تالاپتار قويىلادى. جولعا شىعار الدىندا ءاربىر جۇرگىزۋشى تەكسەرۋدەن ءوتىپ، ارنايى وقۋدان وتەدى، وندا ەرەكشە قاجەتتىلىگى بار جولاۋشىلارعا قالاي دۇرىس كومەكتەسۋ كەرەكتىگىن ۇيرەنەدى.
قاۋىپسىزدىك بارلىق جاعىنان قاداعالانادى: كولىك سالوندارىنا بەينەجازعىشتار ورناتىلادى، ال ديسپەچەرلەر ناقتى ۋاقىت رەجيمىندە ماشينانىڭ قايدا كەلە جاتقانىن جانە تاپسىرىستىڭ قالاي ورىندالىپ جاتقانىن كارتادان باقىلاي الادى.
بۇعان دەيىن «كۋرسيۆ» رەسپۋبليكاداعى كولىك قولجەتىمدىلىگى جاڭارۋعا دايىندالىپ جاتقانىن حابارلاعان. كولىك مينيسترلىگى ينۆاتاكسي جانە جولاۋشىلار تاسىمالى سالاسىندا ءتارتىپ ورناتۋعا ءتيىس جوبانى ۇسىندى.
ودان بۇرىن دەپۋتات اسحات ايماگامبەتوۆ وزگە وڭىرلەرگە باراتىن ازاماتتار ءۇشىن ينۆاتاكسيدىڭ قولجەتىمدىلىگى ماسەلەسىن كوتەرگەن.