قازاقستاننىڭ قىزىل كىتابىنا ەنگەن سيرەك گۇل العاش رەت اتىراۋ ماڭىنداعى تاسكالا اۋىلىنا جاقىن پەرەتاسكا وزەگىندە تابىلدى. بۇرىن لوتوس گۇلدەرى تەك قۇرمانعازى اۋدانىندا عانا بايقالعان. بۇل تۋرالى Atameken Business حابارلايدى.
العاشقى بولىپ وسىمدىكتى جەرگىلىكتى تۇرعىندار بايقادى. «اقجايىق» مەملەكەتتىك تابيعي رەزەرۆاتىنىڭ ماماندارى وقيعا ورنىنا بارىپ، زەرتتەۋ جۇرگىزدى. ءقازىر لوتوستار شاعىن اۋماقتا ءوسىپ تۇر. وسىمدىكتىڭ بۇل جەرگە قالاي كەلگەنى ازىرگە بەلگىسىز: تۇقىم جايىق وزەنىنىڭ اعىسىمەن كەلدى مە، الدە لوتوستى ادامدار ادەيى ەگىپ قويدى ما — بۇل سۇراقتى ءالى زەرتتەۋ كەرەك. اۋماقتى بىرنەشە جىل بويى باقىلاۋ جوسپارلانىپ وتىر.
«تۇقىم نەگىزىنەن سۋ ارقىلى تارالادى. بۇل — قىزىل كىتاپقا ەنگەن ادەمى ءارى سيرەك كەزدەسەتىن گۇلدەردىڭ ءبىرى. قازىرگى تاڭدا لوتوستىڭ ەڭ تانىمال وسەتىن جەرى — گانيۋشكينو اۋىلى. ءقازىر بۇل اۋماق تۋريستىك نىسان سانالادى. الداعى ۋاقىتتا مۇمكىندىك بولسا، تاسكالا دا تۋريستىك ورىنعا اينالۋى مۇمكىن»، — دەيدى «اقجايىق» مەملەكەتتىك تابيعي رەزەرۆاتى ءبولىمىنىڭ مامانى سامال باگىتجانوۆا.