وقۋ جىلىنىڭ باستالۋىنا بىرنەشە كۇن قالدى، ال اتىراۋداعى اتا-انالار بالالارىنىڭ قايدا وقيتىنىن ءالى بىلمەيدى. ولار ءوز اۋدانىنداعى مەكتەپ قۇرىلىسىن اياقتاۋدى تالاپ ەتىپ وتىر، دەپ حابارلايدى infohub.kz.
كوكتەم شاعىن اۋدانىنىڭ تۇرعىندارى 600 ورىندىق جاڭا عيماراتتى بەس جىلدان بەرى كۇتىپ كەلەدى. جەرگىلىكتى تۇرعىن يلياس كاديروۆتىڭ ايتۋىنشا، بالالار ءۇش اۋىسىمدا وقۋعا ءماجبۇر، ال اتا-انالار ولاردى قالىپتى مەكتەپكە اۋىستىرۋعا ۇمىتتەنەدى. «ەگەر مەكتەپ اشىلماسا، ونى تۋرا ايتسىن — ءبىز بەكەر ۇمىتتەنىپ ءجۇرمىز. بالالارىمىز ءۇش اۋىسىمدا وقيدى. ءبىز ولاردى قالىپتى مەكتەپكە اۋىستىرعىمىز كەلەدى. ەگەر بۇل مەكتەپ اشىلماسا، كەشىكتىرمەي-اق، بالالارىمىزدى بىردەن وسىندا اۋىستىرعىمىز كەلەدى»، — دەپ سۇراق قويادى قالا تۇرعىنى.
اتا-انالار بۇل ماسەلەمەن اكىمدىككە بىرنەشە رەت جۇگىنگەن، ءبىراق جاۋاپ الماعان. اتىراۋ شەتىندەگى مەكتەپتى اشۋ تۋرالى ۋادەلەر ءبىرىنشى جىل ەمەس. بۇعان دەيىن مەردىگەر ۇيىم كىدىرىستى مەملەكەتتىك بيۋدجەتتەن قاراجاتتىڭ ۋاقىتىلى تۇسپەۋىمەن تۇسىندىرسە، كەيىن سمەتانىڭ وزگەرگەنىن ايتقان.
ال شەنەۋنىكتەر قۇرىلىس اياقتالعانىن مالىمدەپ وتىر. «كوكتەم شاعىن اۋدانىندا ورنالاسقان 600 ورىندىق مەكتەپتىڭ قۇرىلىسى تولىق اياقتالدى. بارلىق راسىمدەر جۇرگىزىلدى، ءقازىر نىساندى 1 قىركۇيەكتە اشۋعا دايىنداپ جاتىرمىز. قۇرىلىس جۇمىستارى جوباعا وزگەرىستەر ەنگىزۋگە بايلانىستى بۇگىنگە دەيىن سوزىلدى»، — دەدى اتىراۋ وبلىسى قۇرىلىس باسقارماسى ءبولىمىنىڭ باستىعى التىنبەك قۋانعالي.