اتىراۋ وبلىسىندا «مەرەيلى وتباسى-2026» ۇلتتىق بايقاۋىنىڭ ايماقتىق كەزەڭىنىڭ قورىتىندىسى شىعارىلدى. بايقاۋ وتباسى ينستيتۋتىن نىعايتۋعا جانە وتباسىلىق قۇندىلىقتاردى ناسيحاتتاۋعا باعىتتالعان. ماراپاتتاۋ راسىمىنە وبلىس اكىمى بولات اقشولاقوۆ قاتىستى، دەپ حابارلايدى infohub.kz سايتى.
مەملەكەت باسشىسىنىڭ باستاماسىمەن ءوتىپ كەلە جاتقان بايقاۋ 2014 جىلدان بەرى جىل سايىن وتكىزىلەدى. ونىڭ باستى ماقساتى — اتا-انالاردىڭ جاس ۇرپاق تاربيەسىندەگى ءرولىن ارتتىرۋ جانە ءداستۇرلى قۇندىلىقتاردى ساقتاۋ.
ءوڭىر باسشىسى قاتىسۋشىلاردى جەڭىستەرىمەن قۇتتىقتاپ، ىرىكتەۋ كەزەڭىنە قاتىسقان بارلىق وتباسىلارعا العىسىن ءبىلدىردى. «بيىل بۇل بايقاۋ ەلىمىزدە 13ء-شى رەت ءوتىپ وتىر. بۇل وتباسىلىق قۇندىلىقتاردىڭ ءبىزدىڭ قوعام ءۇشىن قانشالىقتى ماڭىزدى ەكەنىن كورسەتەدى. ويتكەنى وتباسى — ءاربىر ادام كۇش الاتىن كيەلى وشاق ءارى قوعامنىڭ ايناسى. اتىراۋ وبلىسى ءوز ءداستۇرىن ساقتايتىن ەڭبەكقور، وتانشىل وتباسىلارمەن ماقتانادى. سىزدەر بۇگىن الىپ جاتقان ماراپات — بۇل تەك جەڭىستىڭ باعاسى عانا ەمەس، وتباسىلىق قۇندىلىقتارعا، اتا-انا ەڭبەگىنە جانە جاس ۇرپاق تاربيەسىنە دەگەن قۇرمەت بەلگىسى. بالالارىڭىزدىڭ جەتىستىكتەرىنە قۋانىپ، نەمەرەلەرىڭىز بەن شوبەرەلەرىڭىزدىڭ باقىتىن كورۋلەرىڭىزگە تىلەكتەسپىن! اتىراۋ وبلىسىنىڭ ءار ۇيىندە ىرىس، بەرەكە جانە تاتۋلىق ورناسىن»، — دەدى بولات اقشولاقوۆ.
بيىل وبلىستىق كەزەڭگە بارلىق اۋداندار مەن اتىراۋ قالاسىنان 62 وتباسى قاتىستى. ولاردىڭ اراسىندا ءبىلىم، دەنساۋلىق ساقتاۋ، اۋىل شارۋاشىلىعى، مادەنيەت، كاسىپكەرلىك جانە باسقا سالالاردىڭ وكىلدەرى بار. كوپبالالى جانە جاس وتباسىلار ەرەكشە بەلسەندىلىك تانىتتى.
فينالدىق كەزەڭگە تەمىرجولشىلار، كاسىپكەرلەر اۋلەتتەرى، سونداي-اق داستۇرلەرى ۇرپاقتان ۇرپاققا جالعاسىپ كەلە جاتقان وتباسىلار قاتارىندا سەگىز وتباسى ءوتتى. وبلىستىق كوميسسيانىڭ شەشىمىمەن ءبىرىنشى ورىندى ماحامبەت اۋدانىنان زۇلقاشەۆتەر وتباسى، ەكىنشى ورىندى يندەر اۋدانىنان سابىروۆتار وتباسى، ءۇشىنشى ورىندى يساتاي اۋدانىنان بولەكوۆتەر وتباسى يەلەندى. جەڭىمپازدارعا باعالى سىيلىقتار تابىستالدى.
وبلىس اتىنان رەسپۋبليكالىق دەڭگەيدە جىلىوي اۋدانىنان وسپانوۆتار وتباسى سىنعا تۇسەدى. بۇل — ۇلكەن ءارى تاتۋ وتباسى، وندا جەتى ۇل جانە ءبىر قىز، 22 نەمەرە جانە 37 شوبەرە تاربيەلەنۋدە. وتباسى مۇشەلەرى ءبىلىم، قۇقىق قورعاۋ، ءوندىرىس جانە مادەنيەت سالالارىندا ەڭبەك ەتەدى.
سونىمەن قاتار، وبلىستىق كەزەڭگە قاتىسقان ءتورت وتباسى العىس حاتتارمەن ماراپاتتالدى.
«مەرەيلى وتباسى-2026» بايقاۋىنىڭ رەسپۋبليكالىق كەزەڭى قازاقستاندا قىركۇيەك ايىنىڭ ەكىنشى جەكسەنبىسىندە اتاپ وتىلەتىن وتباسى كۇنىنە وراي وتەدى.