اتىراۋ مۇناي وڭدەۋ زاۋىتىندا باسشى اۋىستى. «اتىراۋ مۇناي وڭدەۋ زاۋىتى» ءجشس-نىڭ جاڭا باس ديرەكتورى جانە باسقارما ءتوراعاسى بولىپ مۇراتجان مۇسايبەكوۆ تاعايىندالدى، دەپ حابارلايدى infohub.kz سايتى.
تاعايىنداۋ تۋرالى شەشىم كاسىپورىن قاتىسۋشىلارىنىڭ كەزەكتەن تىس جالپى جينالىسىندا قابىلداندى. جاڭا باسشىنى زاۋىت ۇجىمىنا «قازمۇنايگاز» ۇك اق باسقارما ءتوراعاسىنىڭ ورىنباسارى اسەت ماعاۋوۆ تانىستىردى.
مۇسايبەكوۆ «قازمۇنايگاز» جۇيەسىندە جانە مۇناي-گاز سالاسىندا باي تاجىريبەگە يە. ءار جىلدارى ول قمگ-نىڭ مۇناي-گاز وڭدەۋ جانە مۇناي-حيميا جوبالارىن ىسكە اسىرۋ جونىندەگى ديرەكتورى، مۇناي وڭدەۋ جونىندەگى باسقارۋشى ديرەكتورى، «قازمۇنايگاز – وڭدەۋ جانە ماركەتينگ» اق باس ديرەكتورىنىڭ ورىنباسارى قىزمەتتەرىن اتقاردى. سونداي-اق ول «KPI Inc.» ج ش س باسقارما ءتوراعاسىنىڭ ءبىرىنشى ورىنباسارى بولىپ جۇمىس ىستەپ، باسقا دا مەملەكەتتىك جانە جەكە قۇرىلىمداردا قىزمەت ەتتى.
ءاموز-تىڭ جاڭا باسشىسىنىڭ الدىنا وپەراسيالىق تيىمدىلىكتى ارتتىرۋ جانە اشىق ءتۇستى مۇناي ونىمدەرىنىڭ شىعىمدىلىعىن ۇلعايتۋ مىندەتتەرى قويىلدى. سونىمەن قاتار، وندىرىستىك پروسەستەردىڭ سەنىمدىلىگى مەن ەنەرگيا تيىمدىلىگىن ارتتىرۋ، ەكولوگيالىق جوبالاردى جالعاستىرۋ جانە جۇمىسشىلارعا ءقاۋىپسىز ءارى قولايلى جاعداي جاساۋ قاجەت. قمگ باسشىلىعى زاۋىتتىڭ تۇراقتى جانە ۇزدىكسىز جۇمىسىن قامتاماسىز ەتۋگە ەرەكشە نازار اۋداردى.
كاسىپورىن قاتىسۋشىلارىنىڭ كەزەكتەن تىس جالپى جينالىسى بۇرىنعى باس ديرەكتور جانە باسقارما ءتوراعاسى قۋانىش ءبيشىموۆتىڭ وكىلەتتىگىن توقتاتتى.