اتىراۋ وبلىسىندا ەكى لاۋازىمدى تۇلعا مەملەكەتتىك قىزمەتتىڭ بەدەلىن تۇسىرگەنى ءۇشىن جاۋاپكەرشىلىككە تارتىلدى: ءبىر باسشى قىزمەتىنەن ايىرىلدى، ەكىنشىسىنە تولىق ەمەس قىزمەتتىك سايكەستىك تۋرالى ەسكەرتۋ جاسالدى. بۇل تۋرالى وبلىس پروكۋراتۋراسى حابارلادى، دەپ جازادى infohub.kz سايتى.
ۆەدومستۆونىڭ رەسمي سايتىندا كورسەتىلگەندەي، اتىراۋ وبلىسىنىڭ پروكۋراتۋراسى قۇرىلىسقا بولىنگەن بيۋدجەت قاراجاتىن جۇمساۋ كەزىندە ەكى زاڭبۇزۋشىلىقتى انىقتادى. كىنالى لاۋازىمدى تۇلعالار مەملەكەتتىك قىزمەتتىڭ بەدەلىن تۇسىرگەنى ءۇشىن جاۋاپكەرشىلىككە تارتىلدى.
العاشقى وقيعا قۇرمانعازى اۋدانىندا تىركەلدى. 2024 جىلى جەرگىلىكتى قۇرىلىس ءبولىمى قۇرمانعازى اۋىلىندا 600 ملن تەڭگەگە 30 پاتەر ساتىپ العان. ماسەلە كەيىنىرەك انىقتالدى: ءۇي گاز تاراتۋ جەلىلەرىنە قوسىلماعان بولاتىن.
«ءبولىم باسشىسى بۇل تۋرالى ساتىپ الۋعا دەيىن بىلگەن، ءبىراق تەندەردى ءبارىبىر ۇيىمداستىردى — جەكەلەگەن كاسىپكەرلەرگە باسىمدىق بەرىلدى»، — دەپ اتاپ ءوتتى اتىراۋ وبلىسىنىڭ پروكۋراتۋراسىندا.
ەكىنشى وقيعا قىزىلقوعا اۋدانىندا بولدى. مۇندا قۇرىلىس ءبولىمىنىڭ باسشىسى مەردىگەرگە ناقتى ورىندالماعان جۇمىستار ءۇشىن 900 مىڭ تەڭگە اۋدارىپ قويعان.
ماسەلە ەتيكا كەڭەسىنىڭ وتىرىسىندا قارالدى. قۇرمانعازى اۋداندىق قۇرىلىس ءبولىمىنىڭ باسشىسى قىزمەتىنەن بوساتىلدى. ونىڭ قىزىلقوعا اۋدانىنداعى ارىپتەسىنە تولىق ەمەس قىزمەتتىك سايكەستىك تۋرالى ەسكەرتۋ جاريالاندى.
پروكۋراتۋرادا قوسىمشا ايتىلعانداي، وڭىردە وسىنداي زاڭبۇزۋشىلىقتار ءۇشىن تاعى ءۇش لاۋازىمدى تۇلعا جازالاندى.