اتىراۋ وبلىسىنىڭ پروكۋراتۋراسى بيۋدجەت قاراجاتىن جۇمساۋ كەزىندە مەملەكەتتىك قىزمەتتىڭ بەدەلىنە نۇقسان كەلتىرەتىن فاكتىلەردىڭ جولىن كەستى. جۇزدەگەن ميلليون تەڭگەگە تۇرعىن ءۇي ساتىپ الۋ كەزىندەگى الاياقتىق ءۇشىن قۇرمانعازى اۋدانىنىڭ قۇرىلىس ءبولىمىنىڭ باسشىسى قىزمەتىنەن ايىرىلدى، دەپ حابارلايدى infohub.kz سايتى.
قاداعالاۋ ورگانىنىڭ مالىمەتىنشە، 2024 جىلى جەرگىلىكتى قۇرىلىس ءبولىمى قۇرمانعازى اۋىلىندا 600 ملن تەڭگەگە 30 پاتەر ساتىپ العان. الايدا كەيىن تۇرعىن ءۇي گاز تاراتۋ جەلىلەرىنە قوسىلماعانى جانە جايلى تۇرۋعا جارامسىز بولعانى انىقتالدى.
تەرگەۋ بارىسىندا ءبولىم باسشىسى كونكۋرس وتكىزىلگەنگە دەيىن گازبەن جابدىقتاۋدىڭ جوقتىعىن ناقتى بىلگەنى بەلگىلى بولدى. سوعان قاراماستان ول تەندەر ۇيىمداستىرىپ، جەكەلەگەن كاسىپكەرلەرگە ايقىن باسىمدىق بەردى.
شەنەۋنىكتىڭ ءىسى ەتيكا جونىندەگى كەڭەستىڭ وتىرىسىنا شىعارىلدى. قاراۋ قورىتىندىسى بويىنشا قۇرمانعازى اۋداندىق قۇرىلىس ءبولىمىنىڭ باسشىسى مەملەكەتتىك قىزمەتتىڭ بەدەلىنە نۇقسان كەلتىرەتىن تەرىس قىلىق جاساعانى ءۇشىن قىزمەتىنەن بوساتىلدى.
سونىمەن قاتار پروكۋراتۋرا قىزىلقوعا اۋدانىندا دا زاڭبۇزۋشىلىقتاردىڭ جولىن كەستى. مۇندا جەرگىلىكتى قۇرىلىس ءبولىمىنىڭ باسشىسى ورىندالماعان جۇمىستار ءۇشىن مەردىگەرگە 900 مىڭ تەڭگەنى زاڭسىز اۋدارىپ قويعان — وعان قىزمەتتىك سايكەستىگىنىڭ تولىق ەمەستىگى تۋرالى ەسكەرتۋ جاسالدى.
ۆەدومستۆونىڭ حابارلاۋىنشا، اتىراۋ وبلىسىندا وسىعان ۇقساس قارجىلىق بۇزۋشىلىقتار ءۇشىن تاعى ءۇش لاۋازىمدى تۇلعا جاۋاپكەرشىلىككە تارتىلدى.