اتىراۋ وبلىسىندا 2026-2027 وقۋ جىلىنىڭ باسىندا جەتى جاڭا مەكتەپ ەسىگىن ايقاقتى. وقۋشىلار وبلىس ورتالىعىندا، سونداي-اق قۇرمانعازى جانە جىلىوي اۋداندارىندا ورنالاسقان زاماناۋي ءبىلىم وشاقتارىندا ساباقتارىن باستادى، دەپ حابارلايدى infohub.kz سايتى.
اتىراۋ وبلىسى اكىمدىگىنىڭ مالىمەتىنشە، 1 قىركۇيەكتە دامبا اۋىلىنداعى 300 ورىندىق جاڭا مەكتەپتە، سونداي-اق كوكتەم جانە ەركىنقالا-2 اۋىلدارىنداعى ءارقايسىسى 600 ورىندىق ەكى مەكتەپتە العاشقى قوڭىراۋ سوعىلدى.
«كەلەشەك مەكتەپتەرى» ۇلتتىق جوباسى اياسىندا قۇرمانعازى اۋدانىنىڭ قۇرمانعازى جانە اقكول اۋىلدارىندا 600 ورىندىق ەكى مەكتەپ، ال جىلىوي اۋدانىنىڭ قۇلسارى قالاسىندا 1200 ورىندىق مەكتەپ پايدالانۋعا بەرىلدى.
اتىراۋ قالاسىندا 2 مىڭ وقۋشىعا ارنالعان Caspian BINOM School العاشقى شاكىرتتەرىن قابىلدادى. جاڭا مەكتەپتەر زاماناۋي وقۋ كابينەتتەرىمەن، زەرتحانالارمەن، كىتاپحانالارمەن، سپورت جانە اكت زالدارىمەن، اسحانالارمەن جابدىقتالعان. «كەلەشەك مەكتەپتەرىندە» STEM، روبوتوتەحنيكا جانە IT كابينەتتەرى، سونداي-اق شىعارماشىلىق شەبەرحانالار قاراستىرىلعان.
شوقان ءۋاليحانوۆ اتىنداعى №9 جالپى ءبىلىم بەرەتىن مەكتەپ كۇردەلى جوندەۋدەن كەيىن اشىلدى. 1176 وقۋشىعا ارنالعان عيماراتتا وقۋ كابينەتتەرى تولىعىمەن جاڭارتىلىپ، قاجەتتى زاماناۋي قۇرال-جابدىقتار ورناتىلدى.
بيىل اتىراۋ وبلىسىندا 155 مىڭنان استام وقۋشى جاڭا وقۋ جىلىن باستادى. ونىڭ شامامەن 15 مىڭى مەكتەپ تابالدىرىعىن العاش رەت اتتادى.
وڭىردە ءبىلىم ينفراقۇرىلىمىن دامىتۋ جۇمىستارى جالعاسۋدا. جىل سوڭىنا دەيىن تاعى ەكى ءبىلىم نىسانىن جانە ءبىر ونەر مەكتەبىن پايدالانۋعا بەرۋ جوسپارلانۋدا. قازىرگى ۋاقىتتا وبلىستا 14 مەكتەپتىڭ قۇرىلىسى ءجۇرىپ جاتىر.