اتىراۋ وبلىسىندا جۇكتى ايەل كۇيەۋىنىڭ سوققىسىنان ۇيدەن قاشىپ شىققانىن مالىمدەدى. وقيعادان كەيىن ول اۋرۋحاناعا جات قىزىلدى، دەپ حابارلايدى infohub.kz سايتى.
32 جاستاعى اقبوبەك ورازباەۆا تەلەارناعا بەرگەن سۇحباتىندا كۇيەۋىنىڭ بالالارىنىڭ كوزىنشە ونى اياۋسىز سوققىعا جىققانىن ايتتى. ءقازىر جۇكتى ايەل كۇيەۋىن جازالاۋدى تالاپ ەتىپ وتىر.
«مەن جاتقان كەزدە ول كەلىپ، جۇدىرىعىمەن ۇردى. شاماسى، ەكى رەت ۇردى. باسىم، قۇلاعىم — ءبارى شىڭىلدادى. مەن "اللا، اللا" دەپ، جايمانى الدىم، سول كەزدە كىشى قىزىم ويانىپ كەتتى. بالالارىمنىڭ ەكەۋى دە ۇيىقتاماعان ەكەن. ولار قورقىپ، ۇيىقتاپ جاتقان بولىپ جاتقان. ول مەنى ايامايتىنىن ءتۇسىندىم»، — دەدى ايەل.
اقبوبەك ءقازىر يندەر اۋداندىق اۋرۋحاناسىندا جاتىر. ونىڭ ايتۋىنشا، كۇيەۋى بۇعان دەيىن دە قول كوتەرگەن، ءبىراق ول كەشىرگەن. جۇپ ءۇش بالانى بىرگە تاربيەلەپ وتىر. سوڭعى رەت، جۇكتى ايەلدىڭ سوزىنە قاراعاندا، ول بولاشاق ءسابيىنىڭ ومىرىنەن قورىققان.
ايەل پوليسياعا ارىزدانعانى حابارلاندى. ءبىراق ونىڭ ايتۋىنشا، اگرەسسوردى بىردەن بوساتقان. تەك ۇلكەن جانجال شىعارعاننان كەيىن زارداپ شەككەن ايەل ونى قايتا ۇستاتۋعا قول جەتكىزگەن. قۇقىق قورعاۋ ورگاندارى وقيعاعا ازىرگە تۇسىنىكتەمە بەرمەي، ءبارىن انىقتاپ جاتقاندارىن ايتادى.
سونىمەن قاتار، دارىگەرلەر ءقازىر ايەلگە تىنىشتىقتى قاتاڭ ۇسىنىپ وتىر. «تۇسكەن كەزدە ونىڭ باسى مەن جاق سۇيەگى ايماعىندا كوپتەگەن جاراقاتتار بولدى، سول اياعىنىڭ جاعىندا كوگەرۋلەر بار. ول سونداي-اق ءىشىنىڭ اۋىرعانىنا شاعىمداندى. ءقازىر حيرۋرگيا بولىمىندە ەم الۋدا. جاعدايى تۇراقتى»، — دەدى يندەر اۋداندىق اۋرۋحاناسىنىڭ حيرۋرگى اسلانبەك ەرمۇحانوۆ.