اتىراۋدا ءبۇتىن ءبىر وتباسىنىڭ قازاسىنا سەبەپكەر بولدى دەگەن كۇدىكپەن ۇستالعان سۇلتان سارسەماليەۆكە قاتىستى سوت پروسەسى باستالدى. ءىستى تەرگەگەن پوليسيا وكىلى اقبايان مۇقانعاليەۆانىڭ جاعدايى تۋرالى ايتىپ بەردى.
بۇل تۋرالى Infohub.kz اقپارات اگەنتتىگى حابارلايدى.
ءىس بويىنشا تەرگەۋ بارىسى
اتىراۋ وبلىسى پوليسيا دەپارتامەنتى تەرگەۋ باسقارماسىنىڭ اسا ماڭىزدى ىستەر جونىندەگى اعا تەرگەۋشىسى تەمىرحان قاجىمۇراتوۆتىڭ ايتۋىنشا، قىلمىستىق ءىس بويىنشا 40-تان اسا ادامنان جاۋاپ الىنعان. ولاردىڭ قاتارىندا مارقۇمداردىڭ تۋىستارى مەن كورشىلەرى دە بار.
تەرگەۋشىنىڭ مالىمەتىنشە، اقبايان مۇقانعاليەۆاعا قاتىستى قىلمىستىق ءىس قوزعاۋدان باس تارتىلعان. وعان سەبەپ – تەرگەۋ بارىسىندا ونىڭ قىلمىسقا قاتىسى جوق ەكەنى انىقتالعان.
اقباياننىڭ جاعدايى
تەرگەۋشى تەمىرحان قاجىمۇراتوۆ اقبايان مۇقانعاليەۆانىڭ جاعدايىنا قاتىستى دا مالىمەت بەردى. ونىڭ سوزىنشە، الماتىعا جەتكىزىلگەن كەزدە سارسەمالييەۆ قىلمىس جاساعانىن بىردەن مويىنداعان. الايدا، اقبايان سۇراقتارعا جاۋاپ بەرە الماعان.
«مۇقانعاليەۆامەن سويلەسۋ بارىسىندا پسيحيكالىق اۋىتقۋلار بار ەكەنى بايقالدى. سول سەبەپتى تەرگەۋ ارەكەتتەرىن جۇرگىزۋ مۇمكىن بولمادى. سۇراقتارعا تولىققاندى جاۋاپ بەرە المادى»، – دەيدى تەرگەۋشى.
كۇدىكتى دەپ تانىلعان اقبايان كەيىننەن مەديسينالىق ۇيىمعا ورنالاستىرىلعان.