اتىراۋداعى «بەكبولاتوۆتار قۇرىلىس كومپانياسى» 2025 جىلدىڭ قورىتىندىسى بويىنشا 285،3 ملن تەڭگە پايدا تاپتى. ءبىر جىل بۇرىن بۇل كورسەتكىش 2،3 ملرد تەڭگەگە جەتكەن، ياعني پايدا 8،1 ەسەگە قىسقارعان. بۇل تۋرالى infohub.kz سايتى حابارلايدى.
سونىمەن قاتار كاسىپورىننىڭ 2025 جىلعى ءتۇسىمى 8،2 ملرد تەڭگە بولدى، 2024 جىلى بۇل كورسەتكىش 4،98 ملن تەڭگە ەدى — 1،6 ەسەگە وسكەن. 2025 جىلدىڭ سوڭىندا بولىنبەگەن پايدا 7،7 ملرد تەڭگە دەڭگەيىندە تىركەلدى.
كومپانيا اتىراۋدا تىركەلگەن جانە قۇرىلىس-مونتاج جۇمىستارىنا ليسەنزياسى بار. ەسەپتىلىككە سايكەس، ءتۇسىمنىڭ نەگىزگى بولىگىن اتىراۋ مەن اتىراۋ وبلىسىنداعى سۋمەن جابدىقتاۋ نىساندارىن، مەكتەپتەردى، بالاباقشالاردى، ەمحانالار مەن مامانداندىرىلعان مەديسينالىق مەكەمەلەردى، سونداي-اق ينجەنەرلىك-كوممۋنيكاسيالىق ينفراقۇرىلىم مەن وندىرىستىك نىسانداردى سالۋ جانە كۇردەلى جوندەۋدەن وتكىزۋ ەسەبىنەن العان.
اتاپ ايتقاندا، ب ا ق «بەكبولاتوۆتار قۇرىلىس كومپانياسى» اتىراۋداعى نۇرسايا شاعىن اۋدانىندا 6،39 ملرد تەڭگەگە ەمحانا، وركەن شاعىن اۋدانىندا 6،33 ملرد تەڭگەگە ەمحانا سالعانىن حابارلاعان. ەكى نىساننىڭ باستاپقى قۇنى شامامەن 6،7 ملرد تەڭگە بولعان، الايدا جوبالاردى ىسكە اسىرۋ بارىسىندا ول ەكى ەسەگە جۋىق ءوسىپ — 12،7 ملرد تەڭگەگە جەتكەن. اتىراۋ وبلىسىنىڭ قۇرىلىس، ساۋلەت جانە قالا قۇرىلىسى باسقارماسى قىمباتتاۋدى جەر استى سۋلارىنىڭ دەڭگەيىنىڭ كوتەرىلۋىمەن جانە قوسىمشا تەحنيكالىق شەشىمدەر مەن جابدىقتار قاجەتتىلىگىمەن تۇسىندىرگەن.
بۇدان بولەك، كومپانيا اتىراۋ قالالىق تۇرعىن ۇي-كوممۋنالدىق شارۋاشىلىق جانە تۇرعىن ءۇي ينسپەكسياسى ءبولىمىنىڭ قاتتى تۇرمىستىق قالدىقتار پوليگونىن رەكۋلتيۆاسيالاۋعا 11 ملرد تەڭگەگە تاپسىرىسىن العان. وعان سونداي-اق اتىراۋداعى سۋمەن جابدىقتاۋ نىساندارىن كۇردەلى جوندەۋگە كەلىسىمشارت بۇيىرعان: جۇمىستىڭ ەكىنشى كەزەڭى 1،78 ملرد تەڭگەگە، ءۇشىنشىسى تاعى 2 ملرد تەڭگەگە باعالانعان.
«بەكبولاتوۆتار قۇرىلىس كومپانياسىنىڭ» جالعىز يەسى — كاسىپكەر ايبەك تلەميسوۆ. اشىق دەرەككوزدەردە ول تۋرالى مالىمەت جوق.