25 شىلدەدە اقتوبە مەن قوستانايدا، ال تۇندە اتىراۋدا قولايسىز مەتەورولوگيالىق جاعدايلار كۇتىلەدى، دەپ حابارلايدى infohub.kz.
قولايسىز مەتەوجاعدايلار (قمج) تىمىق اۋا رايى، ءالسىز جەل، تۇمان جانە تەمپەراتۋرالىق ينۆەرسيا كەزىندە پايدا بولادى. مۇنداي جاعدايدا زياندى زاتتار اتموسفەرانىڭ جەرگە جاقىن قاباتىندا جينالادى، سونىڭ سالدارىنان اۋا ساپاسى ناشارلايدى.
سينوپتيكتەردىڭ ەسكەرتۋىنشە، قمج كەزەڭىندە لاستانعان اۋانىڭ دەنساۋلىققا كەرى اسەر ەتۋ ءقاۋپى ارتادى، اسىرەسە سوزىلمالى اۋرۋلارى بار ادامدار ءۇشىن.
اۋانىڭ لاستانۋ دەڭگەيىنە جەلدىڭ جىلدامدىعى، جاۋىن-شاشىن، ىلعالدىلىق جانە تەمپەراتۋرا دا اسەر ەتەدى.
قمج كۇتىلەتىن قالالاردىڭ تۇرعىندارىنا كوشەدە، اسىرەسە كولىك قوزعالىسى كوپ جولدار مەن باسقا لاستانۋ كوزدەرىنىڭ جانىندا ۋاقىت وتكىزۋدى ازايتۋعا كەڭەس بەرىلەدى. بالالار، قارت ادامدار جانە جۇكتى ايەلدەرگە ۇزاق سەرۋەندەۋدەن باس تارتۋ ۇسىنىلادى.
تىنىس الۋ ورگاندارى، جۇرەك-قان تامىرلارى جۇيەسى اۋرۋلارى بار ادامدار مەن اللەرگيالىق اۋرۋلارعا قاجەتتى دارى-دارمەكتەرىن ءارقاشان وزدەرىمەن بىرگە الىپ جۇرۋگە كەڭەس بەرىلەدى. اشىق اۋاداعى دەنە جاتتىعۋلارىن شەكتەگەن نەمەسە جابىق ءۇي-جايعا اۋىستىرعان دۇرىس.
بۇعان دەيىن «قازگيدرومەتتە» 25 شىلدەگە قازاقستاننىڭ 17 ايماعىندا 43 گرادۋسقا دەيىنگى كۇشتى جانە انومالدى ىستىق، نايزاعاي، بۇرشاق، ەكپىندى جەل، شاڭدى داۋىلدار جانە توتەنشە ءورت قاۋپىنە بايلانىستى داۋىلدى ەسكەرتۋ جاريالانعانى حابارلاندى.