18 شىلدەدە قازاقستاننىڭ التى قالاسىندا اۋانىڭ لاستانۋىنا اكەلەتىن قولايسىز مەتەوجاعدايلار بولجانىپ وتىر، دەپ حابارلايدى infohub.kz.
مامانداردىڭ مالىمەتىنشە، قمج الماتىدا، سونداي-اق تۇندە استانا، پەتروپاۆل، قاراعاندى، جەزقازعان جانە تەمىرتاۋ قالالارىندا كۇتىلەدى. قولايسىز مەتەوجاعدايلار تىمىق اۋا رايى، ءالسىز جەل، تۇمان جانە تەمپەراتۋرا ينۆەرسياسى كەزىندە پايدا بولادى. سونىڭ سالدارىنان زياندى زاتتار اتموسفەرانىڭ جەر بەتىنە جاقىن قاباتىندا جينالىپ، اۋا ساپاسىن ناشارلاتادى.
سينوپتيكتەردىڭ ەسكەرتۋىنشە، مۇنداي كەزەڭدەردە لاستانعان اۋانىڭ دەنساۋلىققا تەرىس اسەر ەتۋ ءقاۋپى ارتادى، اسىرەسە سوزىلمالى اۋرۋلارى بار ادامدار ءۇشىن. لاستانۋ دەڭگەيىنە جەل جىلدامدىعى، جاۋىن-شاشىن، ىلعالدىلىق جانە اۋا تەمپەراتۋراسى دا اسەر ەتەدى.
تۇرعىندارعا دالادا، اسىرەسە اۆتوموبيل جولدارى مەن باسقا دا لاستانۋ كوزدەرىنىڭ جانىندا بولۋ ۋاقىتىن قىسقارتۋ ۇسىنىلادى. بالالار، قارت ادامدار جانە جۇكتى ايەلدەرگە ۇزاق سەرۋەندەۋدەن باس تارتۋعا كەڭەس بەرىلەدى. تىنىس الۋ ورگاندارى، جۇرەك-قان تامىرلارى جۇيەسى اۋرۋلارى بار ادامدار مەن اللەرگياسى بارلار دارى-دارمەكتەرىن وزدەرىمەن بىرگە الۋى قاجەت. كوشەدەگى دەنە جۇكتەمەلەرىن مۇمكىندىگىنشە جابىق ءۇي-جايلارعا اۋىستىرعان ءجون.
بۇعان دەيىن «قازگيدرومەت» 18 شىلدەگە ارنالعان داۋىلدى ەسكەرتۋ جاريالاعان بولاتىن، ول قازاقستاننىڭ 16 ءوڭىرى مەن استانانى قامتىدى. ءبىرقاتار وبلىستاردا +45 گرادۋسقا دەيىن قاتتى ىستىق، نايزاعاي، بۇرشاق، داۋىلدى جەل، شاڭدى داۋىلدار جانە توتەنشە ءورت ءقاۋپى بولجانىپ وتىر.