22 شىلدەدە قازاقستاننىڭ ءبىرقاتار ايماقتارىندا نايزاعاي، بۇرشاق، كۇشتى جەل، اپتاپ ىستىق جانە شاڭدى داۋىل كۇتىلەدى، دەپ حابارلايدى infohub.kz سايتى.
22 شىلدەگە بىرنەشە ايماققا بىردەن داۋىلدى ەسكەرتۋ جاريالاندى. قازگيدرومەتتىڭ مالىمەتىنشە، ەل تۇرعىندارىن نايزاعاي، قاتتى جاڭبىر، بۇرشاق، كۇشتى جەل، اپتاپ ىستىق جانە شاڭدى داۋىل كۇتىپ تۇر.
الماتى وبلىسىندا جاڭبىر، نايزاعاي، كەي جەرلەردە قاتتى جاۋىن-شاشىن، بۇرشاق جانە داۋىل كۇتىلەدى. جەلدىڭ جىلدامدىعى 15–20 م/س-كە دەيىن كۇشەيەدى، ال كەي جەرلەردە ەكپىنى 25 م/س-كە جەتۋى مۇمكىن. الماتىدا جاڭبىر مەن نايزاعاي كۇتىلسە، قوناەۆتا تۇندە دە جاۋىن-شاشىن مەن جەلدىڭ كۇشەيۋى بولجانادى. ىلە الاتاۋى تاۋلارىندا قاتتى جاڭبىر، بۇرشاق جانە داۋىل ءقاۋپى ساقتالادى.
اباي، جەتىسۋ، ۇلىتاۋ وبلىستارى، قاراعاندى، شىعىس قازاقستان، اقمولا، سولتۇستىك قازاقستان، قوستاناي، جامبىل، پاۆلودار جانە قىزىلوردا وبلىستارىن قوسا العاندا، ءبىرقاتار ايماقتاردا دا نايزاعايلى جاڭبىر كۇتىلەدى. كەيبىر اۋدانداردا قاتتى جاۋىن-شاشىن، بۇرشاق جانە ەكپىنى 23–28 م/س-كە جەتەتىن كۇشتى جەل بولۋى مۇمكىن.
استانادا سينوپتيكتەر جاڭبىر، نايزاعاي، كەي ۋاقىتتا قاتتى جاڭبىر مەن بۇرشاق كۇتەدى. جەلدىڭ ەكپىنى 15–20 م/س بولادى.
ەلدىڭ باتىسى مەن وڭتۇستىگىندە اپتاپ ىستىق ساقتالادى. اقتوبە، باتىس قازاقستان، اتىراۋ جانە ماڭعىستاۋ وبلىستارىندا اۋا تەمپەراتۋراسى كەي جەرلەردە +35…+38 گرادۋسقا دەيىن جەتەدى.
قازگيدرومەت سونداي-اق ەلدىڭ بىرنەشە ايماعىندا ساقتالاتىن جوعارى جانە توتەنشە ءورت ءقاۋپى تۋرالى ەسكەرتەدى.