الداعى كۇندەرى قازاقستاننىڭ باسىم بولىگىندە جاڭبىر مەن نايزاعاي ويناپ، كەي جەرلەردە بۇرشاق جاۋۋى مۇمكىن. سونىمەن قاتار، كەيبىر وڭىرلەردە اپتاپ ىستىق ساقتالادى، دەپ حابارلايدى infohub.kz.
«قازگيدرومەت» رمك سينوپتيكتەرى 20-22 تامىز ارالىعىنا ارنالعان اۋا رايى بولجامىن ۇسىندى. مەتەورولوگتاردىڭ مالىمەتىنشە، اتموسفەرالىق فرونتتاردىڭ وتۋىنە بايلانىستى رەسپۋبليكانىڭ باسىم بولىگىندە جاڭبىر مەن نايزاعاي كۇتىلەدى، جەل كۇشەيەدى، سونداي-اق بۇرشاق جاۋۋى ىقتيمال. ەلدىڭ سولتۇستىك جارتىسىندا تۇندە جانە تاڭەرتەڭ تۇمان تۇسەدى.
قاتتى جاۋىن-شاشىن 20 تامىزدا قازاقستاننىڭ ورتالىعىندا، 21 تامىزدا شىعىسىندا، ال 22 تامىزدا سولتۇستىك-باتىسىندا جانە ەلدىڭ وڭتۇستىك-شىعىسىنداعى تاۋلى اۋدانداردا كۇتىلەدى.
باتىس وڭىرلەردە جانە رەسپۋبليكانىڭ وڭتۇستىك-شىعىسىندا اپتاپ ىستىق ساقتالادى: كۇندىز تەرمومەتر باعاندارى +30...+38 گرادۋسقا جەتەدى، ال ماڭعىستاۋ وبلىسىنىڭ كەيبىر اۋداندارىندا +41 گرادۋسقا دەيىن كوتەرىلەدى.
قالعان اۋماقتاردا تەمپەراتۋرالىق فوندا ايتارلىقتاي وزگەرىس كۇتىلمەيدى. قوستاناي وبلىسىندا تەمپەراتۋرا +20...+30 گرادۋس، سولتۇستىك وبلىستاردا +17...+28 گرادۋس، ورتالىق جانە شىعىس وڭىرلەردە +17...+30 گرادۋس بولادى. قازاقستاننىڭ وڭتۇستىگىندە كۇندىزگى تەمپەراتۋرا +30...+38 گرادۋس ارالىعىندا بولادى.