قازاقستاندىق 127 مىڭعا جۋىق تالاپكەر ءبىلىم گرانتتارىن الۋعا كونكۋرسقا ءوتىنىش بەردى، دەپ حابارلايدى infohub.kz.
بيىل باكالاۆرياتتا وقۋعا 75 مىڭنان استام گرانت ءبولىندى. ونىڭ 60 پايىزى ينجەنەرلىك باعىتتارعا، 20 پايىزى پەداگوگيكالىق ماماندىقتارعا، تاعى 20 پايىزى ەڭبەك نارىعىنىڭ قاجەتتىلىگىن ەسكەرە وتىرىپ، باسقا سالالارعا ارنالعان. بىرنەشە جىل قاتارىنان ەڭ تانىمال ماماندىقتار – ينجەنەرلىك، وڭدەۋ جانە قۇرىلىس، پەداگوگيكالىق عىلىمدار، سونداي-اق اقپاراتتىق-كوممۋنيكاسيالىق تەحنولوگيالار.
«ءبىر گرانتتىق ورىنعا ەڭ ۇلكەن باسەكە بولاشاق اۋدارماشىلار، ديپلوماتتار، زاڭگەرلەر، پسيحولوگتار جانە مۇعالىمدەر اراسىندا كۇتىلەدى»، – دەپ ق ر عىلىم جانە جوعارى ءبىلىم مينيسترلىگىندە اتاپ ءوتتى.
گرانتتاردى تاعايىنداۋ تۋرالى شەشىمدى رەسپۋبليكالىق كونكۋرستىق كوميسسيا قابىلدايدى. ونىڭ قۇرامىنا مەملەكەتتىك ورگانداردىڭ، قوعامدىق ۇيىمداردىڭ وكىلدەرى جانە قوعام قايراتكەرلەرى كىرەدى. گرانت يەلەرىنىڭ ءتىزىمى 10 تامىزعا دەيىن جاريالانادى، ال جوعارى وقۋ ورىندارىنا قابىلداۋ 25 تامىزدا اياقتالادى.