الماتى وبلىسى تۇرگەن اۋىلىندا بىرنەشە اپتا بۇرىن قاتتى جاڭبىردان كەيىن وزەننىڭ ارناسىنان اسىپ كەتۋى سالدارىنان قيراعان اۆاريالىق كوپىردى قالپىنا كەلتىرۋ جۇمىستارى باستالدى. قۇرىلىس جۇمىستارىن ءۇش اي ىشىندە اياقتاۋ جوسپارلانۋدا، دەپ حابارلايدى infohub.kz.
انىقتالعانداي، كوپىر 2024 جىلى-اق اۆاريالىق دەپ تانىلعان. بۇگىن الماتى وبلىسىنىڭ اكىمى مارات سۇلتانعازييەۆ نىساندى ارنايى ارالاپ، قۇرىلىس بارىسىمەن تانىستى. قازىرگى ۋاقىتتا نىساندا ءتورت بىرلىك تەحنيكا جۇمىلدىرىلعان، جۇمىستاردى وننان استام مامان اتقارۋدا. كوپىر قۇرىلىسى ءبىر اپتا بۇرىن باستالعان، بۇزۋ جۇمىستارى تولىق اياقتالدى، بۇرعىلاۋ جۇمىستارىنا دايىندىق جۇرگىزىلۋدە. مەردىگەردىڭ ايتۋىنشا، نىساندى قاراشا ايىندا تولىق پايدالانۋعا بەرۋ جوسپارلانۋدا.
«بۇل كوپىر تۇرعىندار ءۇشىن دە، تۋريستەر ءۇشىن دە ماڭىزدى. سوندىقتان جۇمىس ساپاسى مەن قۇرىلىس مەرزىمىن ساقتاۋعا ەرەكشە كوڭىل ءبولۋ قاجەت. جوبانى ىسكە اسىرۋدىڭ ءاربىر كەزەڭىندە بارلىق تەحنيكالىق تالاپتار قاتاڭ ورىندالۋى ءتيىس»، — دەپ اتاپ ءوتتى ءوڭىر باسشىسى.
بۇعان دەيىن سەل سالدارىنان تۇرگەن وزەنى الماتى وبلىسى ەڭبەكشىقازاق اۋدانىنداعى اسسى ۇستىرتىنە دەيىنگى جولدى شايىپ كەتكەنى حابارلانعان بولاتىن. قۇتقارۋشىلار تۇرگەن شاتقالىنان 42 ادامدى، ونىڭ ىشىندە ءۇش بالانى ەۆاكۋاسيالادى.