الماتى وبلىسىنىڭ ىلە اۋدانىندا «بايسەركە اسپانى – 2026» اۆيافەستيۆالى اشىلدى. قوناقتاردى اەرودروم ۇستىندەگى ۇشۋلار، اۋە كەمەلەرىنىڭ كورمەسى جانە ۇشقىشتارمەن كەزدەسۋلەر كۇتىپ تۇر، دەپ حابارلايدى infohub.kz سايتى.
سونداي-اق ءىس-شارا وڭىردەگى شاعىن اۆياسيانى دامىتۋدى تالقىلاۋ الاڭىنا اينالدى. فەستيۆال اياسىندا وتكەن ءباسپاسوز ءماسليحاتىندا ساراپشىلار جاستاردى تەحنيكالىق ماماندىقتارعا تارتۋ، اۆياسيالىق مادەنيەتتى قالىپتاستىرۋ جانە الماتى وبلىسىنىڭ تۋريستىك الەۋەتىن ارتتىرۋ ماسەلەلەرىن قوزعادى.
كەزدەسۋگە «بايتەرەك» اق باسقارما ءتوراعاسى، ۇشقىش-عارىشكەر ايدىن ايىمبەتوۆ، «وتان» اەروكلۋبىنىڭ جەتەكشىسى يۋري ەلسوۆ، «تيان-شان» اۆياسيالىق ورتالىعىنىڭ باس ديرەكتورى ۆلاديمير انسۋپوۆ جانە قازاقستاندىق شاعىن اۆياسيا قاۋىمداستىعىنىڭ پرەزيدەنتى ومىربەك كەنەسبايەۆ قاتىستى.
سپيكەرلەر اۆياسيا تەك كاسىبي سالامەن شەكتەلمەۋى كەرەك، ال بالالاردىڭ ۇشقىش، ينجەنەر جانە تەحنيك سياقتى ماماندىقتارعا قىزىعۋشىلىعىن ارتتىرۋ ماڭىزدى ەكەنىن اتاپ ءوتتى. «اۋە تەحنيكاسىن ءوز كوزىمەن كورىپ، ماماندارمەن سويلەسكەن جاستار بولاشاق كاسىبي باعىتىن انىقتاي الادى»، – دەپ سانايدى ولار.
ءباسپاسوز ءماسليحاتىنان كەيىن فەستيۆالدىڭ نەگىزگى باعدارلاماسى باستالدى. قوناقتار ۇشاقتاردىڭ اسەرلى ۇشۋلارىن، اشىق اسپان استىنداعى تەحنيكا كورمەسىن تاماشالاپ، اۆياسيالىق ماماندىقتاردىڭ ەرەكشەلىكتەرى تۋرالى ماماندارمەن جەكە سويلەسە الدى.
ۇيىمداستىرۋشىلار اۆياسيا مەن ءتۋريزمدى بىرىكتىرۋ وڭىرگە دەگەن قىزىعۋشىلىقتى ارتتىرۋى مۇمكىن ەكەنىن اتاپ ءوتتى. «وسى تۇرعىدا فەستيۆال تەك اۋە تەحنيكاسىنىڭ كورمەسى رەتىندە عانا ەمەس، ءوڭىردىڭ تۋريستىك كورىكتى جەرلەرىن جاڭا قىرىنان تانىستىرۋ الاڭى رەتىندە دە قاراستىرىلادى»، – دەلىنگەن حابارلامادا.