گرۋزياداعى باتۋم مۇناي تەرمينالى سەگىز جىلدىق ۇزىلىستەن كەيىن قازاقستانعا اۆياسيالىق كەروسين تيەپ-تۇسىرۋدى قايتا باستادى، — دەپ حابارلايدى infohub.kz سايتى.
«قازترانسويل» اق-نىڭ شەتەلدىك اكتيۆى سانالاتىن بۇل تەرمينال قازاقستانعا جونەلتۋ ءۇشىن اۆياوتىندى قايتا قابىلداي باستادى. شىلدە ايىندا JET A1 ماركالى 10 مىڭ توننا كولەمىندەگى اۆياسيالىق كەروسيننىڭ العاشقى پارتياسى تيەلدى. ەۋروپادا وندىرىلگەن وتىن قارا تەڭىز ارقىلى تەڭىز جولىمەن جەتكىزىلىپ، ءقازىر قازاقستانعا تاسىمالداۋ ءۇشىن تەمىرجول سيستەرنالارىن كۇتۋدە.
كومپانيادا تيەپ-تۇسىرۋدىڭ قايتا جاندانۋى ترانسكاسپي حالىقارالىق كولىك باعىتى (ورتا ءدالىز) بويىنشا ەلگە اۆياوتىن جەتكىزۋگە مۇمكىندىك بەرەتىنىن اتاپ ءوتتى. «JET A1 اۆياسيالىق كەروسينى — ازاماتتىق اۆياسيانىڭ نەگىزگى وتىن ءتۇرى. ول اۋە كەمەلەرىنىڭ سەنىمدى پايدالانىلۋىن جانە اۆياتاسىمالداردىڭ ۇزدىكسىز ورىندالۋىن قامتاماسىز ەتەدى»، — دەپ مالىمدەدى «قازترانسويل» اق.
كومپانيادا اۆياوتىننىڭ تۇراقتى جەتكىزىلۋى قازاقستاننىڭ كولىك سالاسىن دامىتۋ، ۇتقىرلىقتى ارتتىرۋ جانە ەلدىڭ ەنەرگەتيكالىق قاۋىپسىزدىگىن نىعايتۋ ءۇشىن ماڭىزدى ەكەنىن اتاپ ءوتتى. باتۋم مۇناي تەرمينالى مۇناي مەن مۇناي ونىمدەرىن تيەپ-تۇسىرۋگە ماماندانعان. ول ارقىلى اۆياسيالىق كەروسيننەن باسقا، شيكى مۇناي، مازۋت، ديزەل وتىنى، اۆتوموبيل بەنزينى، سۇيىتىلعان كومىرسۋتەك گازدارى جانە باسقا دا مۇنايلى جۇكتەر وتەدى. 2026 جىلدىڭ ءبىرىنشى جارتىجىلدىعىندا تيەپ-تۇسىرۋ كولەمى شامامەن 725 مىڭ توننانى قۇرادى.