2026 جىلدىڭ العاشقى التى ايىندا قازاقستاندىق اۆتوكولىك يەلەرى تەحنيكالىق قىزمەت كورسەتۋ جانە جوندەۋ ستانسيالارىنا 179،6 ملرد تەڭگە جۇمساعان. بۇل وتكەن جىلدىڭ سايكەس كەزەڭىمەن سالىستىرعاندا 25%-عا ارتىق، دەپ حابارلايدى infohub.kz سايتى.
ال ينفلياسيانى ەسەپتەمەگەندە، ناقتى كورسەتكىش نەبارى 8،1%-عا وسكەن. ياعني، اينالىمنىڭ ءوسۋىنىڭ باسىم بولىگى قىزمەت باعاسىنىڭ قىمباتتاۋىنا بايلانىستى.
2026 جىلدىڭ ماۋسىمىندا اۆتوكولىككە تەحنيكالىق قىزمەت كورسەتۋ جانە جوندەۋ ءبىر جىل بۇرىنعىدان ورتا ەسەپپەن 13،5%-عا قىمباتتاعان. جىل باسىنان بەرى باعا تاعى 7،5%-عا وسكەن، ال ەڭ ۇلكەن سەكىرىس ساۋىردە تىركەلگەن — ءبىر ايدا 4،6%-عا.
ءبىر جىل ىشىندە ستو قىزمەتى ەڭ قاتتى پاۆلودار وبلىسىندا قىمباتتاعان — 76،5%، ۇلىتاۋ وبلىسىندا — 21،5%، ماڭعىستاۋ وبلىسىندا — 20%، جەتىسۋ وبلىسىندا — 18،6%، اباي وبلىسىندا — 17،9% جانە قوستاناي وبلىسىندا — 17،5%.
ءىرى قالالار اراسىندا باعا ءوسىمى بويىنشا الماتى كوش باستاپ تۇر — قىزمەت 15،2%-عا قىمباتتاعان. استانادا ءوسىم 13،6% بولسا، شىمكەنتتە ءبىر جىل ىشىندە باعا وزگەرمەگەن.
2025 جىلدىڭ قورىتىندىسى بويىنشا قازاقستاندىق اۆتوسەرۆيستەردىڭ قىزمەت كولەمى 435،3 ملرد تەڭگەگە جەتكەن. الماتىعا 139،3 ملرد تەڭگە، استاناعا 73،1 ملرد، اتىراۋ وبلىسىنا 34،9 ملرد تەڭگە تيەسىلى. بۇل ايماقتار بىرگە نارىقتىڭ 56،8%-ىن قامتاماسىز ەتكەن.
ەل بويىنشا شامامەن 8،9 مىڭ ستو مەن اۆتوسەرۆيس جۇمىس ىستەگەن. ەڭ كوبى الماتىدا (شامامەن 1،3 مىڭ)، قاراعاندى وبلىسىندا (919) جانە استانادا (767).
2020 جىلدىڭ ءبىرىنشى جارتىجىلدىعىمەن سالىستىرعاندا ستو قىزمەتىنىڭ كولەمى شامامەن 4،3 ەسە وسكەن.