قازاقستاننىڭ 30-دان استام تۇرعىنى اۆتوكولىكتەرىن اۆتوسالون ارقىلى ساتپاق بولىپ، الاياقتىقتىڭ قۇربانى بولدى. كولىك يەلەرى نارىقتىق باعامەن تەز ساتىلادى دەگەن ۋادەگە سەنىپ، كولىكتەرىن كومپانياعا تاپسىرعان. الايدا اقشا دا، كولىك تە الماعان. كومپانيا قىزمەتكەرلەرى بايلانىسقا شىقپاي كەتكەن. بۇل تۋرالى infohub.kz سايتى حابارلايدى.
زارداپ شەككەندەردىڭ ايتۋىنشا، ولار كولىكتى قىسقا مەرزىمدە باعاسىن تومەندەتپەي ساتامىز دەگەن كومپانياعا جۇگىنگەن. 30-دان استام ادام كولىكتەرىن اۆتوسالونعا قالدىرعان. ءبىراق ءبىراز ۋاقىت وتكەن سوڭ كەڭسەگە كەلگەندە، قىزمەتكەرلەر دە، كولىكتەر دە جوق بولىپ شىققان.
كولىگىنەن ايىرىلعانداردىڭ ءبىرى اسحات قاراقۇل بىلاي دەدى: «مەن بۇل كومپانيانى الەۋمەتتىك جەلىدەن تاپتىم. كولىكتى 12،2 ميلليون تەڭگەگە ساتىپ، ءۇش-تورت كۇن ىشىندە اقشاسىن اۋدارامىز دەپ ۋادە بەردى. كەيىن كەلىسىمشارتتا 14 كۇن دەپ جازىلعان دەپ سوزبەن عانا ايتىپ، ۋادەلەرمەن توقتاتتى. بۇل بىرنەشە اي بۇرىن بولعان!»
زارداپ شەككەندەردىڭ ايتۋىنشا، كولىكتەردى تاپسىرعاننان كەيىن كەلەسى كۇنى-اق ولاردى فيرما ديرەكتورىنىڭ اتىنا قايتا تىركەگەن. كەيبىر كولىكتەر بىرنەشە رەت ساتىلعان نەمەسە لومباردقا قويىلعان. كەيبىرى ءالى دە اۆتوسالوندا تۇر، ءبىراق يەلەرى ولارعا قول جەتكىزە الماي وتىر. كولىك يەلەرى زارداپ شەككەندەردىڭ سانى ودان دا كوپ بولۋى مۇمكىن دەپ ەسەپتەيدى.
زارداپ شەككەندەر زالالدى وتەۋدى سۇراپ، قۇقىق قورعاۋ ورگاندارىنا جۇگىنگەن. پوليسيا كۇدىكتىلەردىڭ ۇستالعانىن حابارلادى. الماتى وبلىسى پوليسيا دەپارتامەنتىنىڭ وكىلى ەرنار سايديلدين بىلاي دەدى: «بۇل فاكتىگە قاتىستى پوليسيا قىزمەتكەرلەرى اسا ءىرى مولشەردە جاسالعان الاياقتىق بەلگىلەرى بويىنشا سوتقا دەيىنگى تەرگەۋ جۇرگىزۋدە. قازىرگى ۋاقىتتا قاجەتتى تەرگەۋ ارەكەتتەرىنىڭ كەشەنى جۇرگىزىلۋدە. تەرگەۋدىڭ تولىقتىعى، جان-جاقتىلىعى جانە وبەكتيۆتىلىگىن قامتاماسىز ەتۋ ءۇشىن ارنايى تەرگەۋ-جەدەل توبى قۇرىلدى. تەرگەۋ بارىسى الماتى وبلىسى پوليسيا دەپارتامەنتى باسشىلىعىنىڭ ەرەكشە باقىلاۋىندا».