ازداعان جانارمايى قالعان باكپەن ۇنەمى ءجۇرۋ بەنزوناسوسستىڭ توزۋىن تەزدەتۋى مۇمكىن، دەپ ەسكەرتتى اۆتوساراپشى دميتري سلاۆنوۆ. كوپ جۇرگىزۋشى جانارماي قۇيۋدى اسپاپتار تاقتاسىندا وتىننىڭ ازايعانى تۋرالى شام جاققانشا كەيىنگە قالدىرادى. الايدا بۇل ادەت كولىككە ءقاۋىپتى، دەپ حابارلايدى infohub.kz سايتى.
ساراپشىنىڭ تۇسىندىرۋىنشە، بەنزوناسوس تىكەلەي جانارماي باگىندا ورنالاسقان جانە جۇمىس كەزىندە ول ارقىلى وتەتىن وتىنمەن سالقىنداتىلادى. بەنزين تىم ازايعاندا ناسوستىڭ جۇمىس جاعدايى ناشارلايدى: ول قىزىپ كەتۋى، ال قىزمەت مەرزىمى قىسقارۋى مۇمكىن.
سلاۆنوۆ توزعان توراپتىڭ بەلگىلەرىنىڭ ءبىرى رەتىندە قوزعالتقىش ىسكە قوسىلعاننان كەيىن كولىكتىڭ ارتقى جاعىنان شىعاتىن ادەتتەن تىس ىزىڭدى اتايدى. دەگەنمەن تەك وسى بەلگىگە سەنۋگە بولمايدى — ناسوس ايقىن ەسكەرتۋسىز دە ىستەن شىعۋى مۇمكىن.
تاعى ءبىر ماسەلە بار. ۋاقىت وتە كەلە جانارماي باگىنىڭ تۇبىندە ءتۇرلى قوقىستار جينالۋى مۇمكىن. بەنزين وتە از بولعاندا ولاردىڭ وتىن جۇيەسىنە ءتۇسۋ ىقتيمالدىعى ارتادى. بۇل بەنزوناسوسقا جانە وتىن بەرۋ جۇيەسىنىڭ باسقا دا ەلەمەنتتەرىنە قوسىمشا سالماق تۇسىرەدى.
شام جانىپ تۇرعاندا مەزگىل-مەزگىل ءجۇرۋ جەڭىل كولىكتىڭ بىردەن ىستەن شىعاتىنىن بىلدىرمەيدى: قازىرگى مودەلدەر وتىننىڭ تومەن دەڭگەيىندە جۇمىس ىستەۋگە ەسەپتەلگەن. ماسەلە — باكتى ارەڭ بوس كۇيدە ۇستاپ ءجۇرۋدىڭ تۇراقتى ادەتىنە اينالۋىندا. سوندىقتان جانارماي قۇيۋدى سوڭعى ليترلەرگە دەيىن كەيىنگە قالدىرماعان ءجون.
بۇعان دەيىن كۋرسيۆ اۆتو قازاقستاندا ساپاسىز بەنزيننەن كولىگى ب ۇلىنگەن اۆتوكولىك يەلەرىنە جوندەۋ شىعىنىن وتەۋدى ۇسىنعانىن حابارلاعان.