ۇزاق جۇمىس كۇنىنەن كەيىن كەشكە اياقتىڭ ءىسىنۋى ءاردايىم تامىرلارداعى اقاۋلىقتى بىلدىرمەيدى — كەيدە سەبەبى ورگانيزمدەگى باسقا دا بۇزىلىستاردا جاتادى. بۇل تۋرالى الەۋمەتتىك جەلىلەردەگى پاراقشاسىندا استانالىق انگيوحيرۋرگ فارحاد ادىلحانوۆ ايتتى، دەپ حابارلايدى infohub.kz سايتى.
دارىگەردىڭ ايتۋىنشا، اياق ۇنەمى ىسىنەتىن بولسا، ءىسىنۋدى كەتىرۋگە تىرىسقاننان گورى ونىڭ نەدەن پايدا بولاتىنىن انىقتاۋ ماڭىزدى.
«اياقتىڭ ءىسىنۋى — بۇل دياگنوز ەمەس، سيمپتوم. سەبەبى تامىرلاردا، جۇرەكتە، بۇيرەكتە، ەندوكريندىك جۇيەدە جانە ت.ب. بولۋى مۇمكىن»، — دەدى مامان.
جۇرەك ىسىنۋلەرى. جۇرەك جۇمىسى بۇزىلعاندا ءىسىنۋ ادەتتە ەكى اياقتا دا پايدا بولادى. ولار ەنتىگۋمەن قاتار ءجۇرۋى مۇمكىن، مىسالى، باسپالداقپەن كوتەرىلگەندە.
بۇيرەك ىسىنۋلەرى. بۇيرەك اۋرۋلارىندا ءىسىنۋ ءجيى تاڭەرتەڭ بايقالادى. ول تەك اياقتا عانا ەمەس، بەت پەن قاباقتا دا پايدا بولۋى مۇمكىن. دارىگەر تاعى ءبىر ىقتيمال بەلگى رەتىندە ءزار شىعارۋدىڭ وزگەرۋىن اتايدى.
ەندوكريندىك ىسىنۋلەر. مۇمكىن نۇسقالاردىڭ ءبىرى — قالقانشا بەزىنىڭ قىزمەتى تومەندەۋىنەن (گيپوتيرەوز) بولاتىن ءىسىنۋ. مۇنداي ىسىنۋلەر كوبىنەسە تىعىز بولىپ، باسقاندا باتىپ كەتپەيدى. ولار گيپوتيرەوزدىڭ باسقا بەلگىلەرىمەن قاتار ءجۇرۋى مۇمكىن: ءۇسىنۋ، تەرىنىڭ قۇرعاۋى، السىزدىك، سالماق قوسۋ جانە بەتتىڭ ءىسىنۋى.
ۆەنوزدىق ىسىنۋلەر. تامىرلاردا اقاۋلىق بولعاندا ءىسىنۋ ادەتتە كەشكە كۇشەيەدى، اسىرەسە ۇزاق تۇرعاننان نەمەسە وتىرعاننان كەيىن. تۇنگى دەمالىستان نەمەسە اياقتى كوتەرگەننەن كەيىن ولار، ادەتتە، ازايادى.
«ۆەنوزدىق ىسىنۋلەر ءجيى ۆەنوزدىق بەلگىلەرمەن قاتار جۇرەدى: ۆاريكوزدى تامىرلار، اياقتىڭ اۋىرلىعى»، — دەپ اتاپ ءوتتى انگيوحيرۋرگ جازباسىندا.
ۆەنوزدىق ىسىنۋلەر سوزىلمالى بولۋى مۇمكىن، مىسالى، ۆاريكوز اۋرۋىنا بايلانىستى، نەمەسە جەدەل — تامىردىڭ ترومبپەن بىتەلۋىنەن تۋىندايدى. ترومبوز كەزىندە ءىسىنۋ ءجيى ءبىر جاقتا پايدا بولادى.
وسىلايشا، ءىسىنۋدىڭ سەبەبىن بولجاۋ ءۇشىن ونىڭ پايدا بولۋ ۋاقىتىن، ايقىندىلىعىن، باسقا سيمپتومداردىڭ بار-جوعىن جانە دەمالىستان كەيىن جاعدايدىڭ قالاي وزگەرەتىنىن ەسكەرۋ كەرەك.
ەگەر ءىسىنۋ ۇنەمى قايتالاناتىن بولسا، تامىر حيرۋرگىنە قارالىپ، تامىرلارعا ۋدز جاساتۋ كەرەك.
بۇعان دەيىن Kursiv Health فيزيوتەراپەۆت مامانىنىڭ كەڭەستەرىمەن بولىسكەن بولاتىن: مويىن قىسىلعاندا ناقتى نە ىستەۋگە بولمايدى.